प्रवाशांना नाकाला रुमाल लावून बसण्याची वेळ
| पनवेल । वार्ताहर ।
स्थानकाच्या एका कोपर्‍यात स्वच्छतागृह असल्यामुळे बसमधून पुढच्या प्रवासासाठी निघालेले प्रवासी लघुशंकेसाठी खाली उतरल्यानंतर सुविधा नसल्यामुळे थेट शेजारी असलेल्या अंधाराचा फायदा घेऊन तिथेच कार्यभाग उरकतात. दररोज घडत असलेल्या या प्रकारामुळे बसस्थानकात कायम दुर्गंधी पसरलेली असते. पुनर्विकासाच्या प्रतीक्षेत असलेल्या एसटी आगारात अनेक समस्यांसोबत अस्वच्छतेची नवी समस्या प्रवाशांची डोकेदुखी ठरते आहे. बसथांब्यावर स्वच्छतागृह नसल्यामुळे बसथांब्याच्या बाजूला चिकटूनच मोकळ्या जागेत प्रवासी लघुशंका उरकून घेतात. त्यामुळे या परिसरात कायम दुर्गंधी पसरलेली असते.
पनवेल आगारात दररोज सुमारे पाच हजार एसटी बसची ये-जा सुरू असते. आगाराच्या पुनर्विकासाचा प्रश्‍न सरकारी लालफितीत अडकला आहे. मुंबई दुसर्‍या क्रमांकाचे चांगले उत्पन्न देणारे एसटी आगार असलेल्या पनवेलची अवस्था दिवसेंदिवस दयनीय होत चालली आहे. आगारात सध्या लांबपल्ल्याच्या बस थांबण्यासाठी एकमेव शेड शिल्लक आहे. राज्याच्या कानाकोपर्‍यासह, राज्याच्या बाहेर जाणार्‍या बस या थांब्यावर थांबतात. त्यामुळे जागा अपुरी असूनही प्रवाशांची मोठी गर्दी येथे असते. येथे स्वच्छतागृहाची सोय नाही. स्थानकाच्या एका कोपर्‍यात असल्यामुळे बसमधून पुढच्या प्रवासासाठी निघालेले प्रवासी लघुशंकेसाठी खाली उतरल्यानंतर सुविधा नसल्यामुळे थेट शेजारी असलेल्या अंधाराचा फायदा घेऊन तिथेच कार्यभाग उरकतात. दररोज घडत असलेल्या या प्रकारामुळे बसस्थानकात कायम दुर्गंधी पसरलेली असते. बसची वाट पाहात बसलेल्या, अलिबागसाठी भलीमोठी रांग लावून बसलेल्या प्रवाशांना नाकाला रूमाल लावून बसण्याशिवाय पर्याय राहिलेला नाही. प्रवासी उघडपणे करतात, परंतु यांना हटकण्यासाठी आगारातील कोणतेही कर्मचारी येथे नसतात. त्यामुळे आगार व्यवस्थापनाचा या प्रकाराला पाठिंबा आहे की काय, असा प्रश्‍न येथील प्रवाशांना पडला आहे.
मी पाच वर्षांपासून दररोज पनवेल-अलिबाग प्रवास करतो. लघुशंकेला शेकडो पुरूष उघड्यावर जातात. एसटी आगाराने केवळ फलक लावून हात वर केले आहेत. परंतु त्यांच्यावर कारवाई कोणीही पुढे येत नाही. – प्रवासी
महापालिकेचेही दुर्लक्ष
उघड्यावर लघुशंका करणार्‍यांवर महापालिका दंड आकारते, असे महापालिकेकडून सांगितले जाते. परंतु दररोज हजारो प्रवासी उघड्यावर लघुशंका करणार्‍या पनवेल महापालिकेला ही परिस्थिती दिसत नाही का?असा प्रश्‍न उपस्थित झाला आहे.