माणगाव तालुक्यात बकरी ईद साजरी

। माणगाव । वार्ताहर ।

माणगाव तालुक्यात सोमवारी (दि.17) ईद-उल-अजहा म्हणजेच बकरी ईद सर्वत्र उत्साहात साजरी करण्यात आली. मुस्लिम बांधवानी एकमेकांना गळाभेट आलिंगन देत बकरी ईदच्या शुभेच्छा दिल्या. तसेच हिंदू बांधवांनीही मुस्लिम बांधवांची घरोघरी भेट घेऊन तसेच, दूरध्वनीवरून बकरी ईदच्या शुभेच्छा दिल्या. यादिवशी माणगाव पोलीस निरीक्षक राजेंद्र पाटील यांच्या मार्गदर्शनाखाली तालुक्यात सर्वत्र चोख पोलीस बंदोबस्त ठेवण्यात आला होता.

माणगाव तालुक्यातील माणगाव, जुने माणगाव, नाणोरे, लोणशी, मोर्बा, निजामपूर, दहिवली, दहिवलीकोंड, तारणा, वडवली, साई, मांजरवणे, गोरेगाव, टेमपाले, लाखपाले, वणी, पुरार, हारकोळ आदी मोठी मुस्लीम वस्ती असलेल्या सर्व गावांतून बकरी ईद उत्साहात साजरी करण्यात आली. जुने माणगाव मस्जिद मोहल्ला येथील मशिदीत हजारो मुस्लीम बांधवांनी सोमवारी सकाळी बकरी ईदची नमाज अदा केली. यावेळी मौलाना हाजीमिया जामदार यांनी कुराणाचे वाचन करून उपस्थित मुस्लिम बांधवाना बकरी ईदचे महत्व सांगितले. या बकरी ईदनिमित्त अनेक मुस्लीम बांधवांनी अल्लाहच्या नावाने बोकडाच्या कुर्बानी दिल्या.

माणगावनगरीचे नगराध्यक्ष ज्ञानदेव पवार, माजी नगराध्यक्ष आनंद यादव, उपनगराध्यक्ष राजेश मेहता, नगरसेवक दिनेश रातवडकर, उद्योजक अरुण क्षिरसागर, शंकर शिंदे गुरुजी, उर्मिला शिंदे, सामाजिक कार्यकर्ते संजय साबळे, सामाजिक कार्यकर्त्या सुवर्णा जाधव, कल्पना पाखुर्डे, यशोधरा गोडबोले, एकता ग्रामीण क्रिकेट असोसिएशन माणगाव संस्थापक राहुल दसवते यांनी नमाज झाल्यावर मशीद ठिकाणी व घरोघरी जाऊन मुस्लिम बांधवांची भेट घेऊन त्यांना ईदच्या शुभेच्छा दिल्या. तसेच अनेक हिंदू बांधवानी प्रत्यक्षात भेटून व दूरध्वनीवरून मुस्लीम बांधवाना ईदच्या शुभेच्छा दिल्या.