बारचालक शासनाविरोधात आक्रमक

परवानाधारकांना नियमांचे बंधन, बेकायदेशीर विक्री करणारे मोकाट

| महाड | प्रतिनिधी |

संपूर्ण राज्यामध्ये सोमवारी परमिट रूम आणि बार चालकांनी एकदिवसीय बंद ठेवून शासनाच्या करवाढी विरोधात आंदोलन केले. परवानाधारक नियमांचे काटेकर पालन करत असून, बेकायदेशीर विक्री करणारे मात्र अधिकाऱ्यांच्या वरदहस्तामुळे मोकाट आहेत, असा आरोप करत कायदेशीर कारवाई झाली नाही तर परवानाधारक आपले परवाने शासन दरबारी जमा करतील, असे आव्हान दिले.

राज्यातील परमिट रूम आणि बारधारकांनी सोमवारी शासनाच्या करवाढीविरोधात दुकाने बंद ठेवून एक दिवशी आंदोलन केले. महाडमध्ये देखील महाड, पोलादपूर, बिरवाडी परमिट रूम आणि बार असोसिएशनकडून या आंदोलनात सहभाग घेऊन तालुक्यातील बार बंद ठेवण्यात आले. यावेळी शासनाच्या करवाढीविरोधात घोषणा देण्यात आल्या. दहा टक्के वॅट तात्काळ रद्द करावा तसेच परवाना नूतनीकरणाची ही स्थिर करावी व वार्षिक वाढ थांबवावी, मद्यविक्रीतून महसूल विक्रीचा हेतू डोळ्यासमोर ठेवून मद्यनिर्मितीच्या पहिल्या टप्प्यावरच टॅक्स लागू करावा जेणेकरून विक्रेत्यांवर दुहेरीकरण भार येणार नाही, अशा प्रकारच्या मागण्या यावेळी करण्यात आल्या.

याबाबतचे निवेदन महाड प्रांत कार्यालयामध्ये असोसिएशनच्यावतीने देण्यात आले. यावेळी बोलताना महाड पालक बिरवाडी परमिट रूम बार असोसिएशनच्या पदाधिकाऱ्यांनी अनधिकृत मद्य विक्री करणाऱ्यांना लक्ष केले. तालुक्यामध्ये धाबे, चायनीज फूड विक्रेते, टपऱ्या या ठिकाणी अनधिकृतपणे मद्य विक्री केली जाते. हे सर्व राज्य उत्पादन शुल्क विभागाच्या आणि पोलीस प्रशासनाच्या अधिकाऱ्यांच्या डोळ्यासमोर असूनदेखील कोणत्याच प्रकारची कारवाई केली जात नसल्याने परवानाधारक मद्य विक्रेत्यांवर उपासमारीची वेळ आली आहे. याबाबत कारवाईच्या मागणी करूनदेखील संबंधित अधिकारी दुर्लक्ष करतात, यावरूनच अनधिकृत विक्रेत्यांचे आणि अधिकाऱ्यांचे संबंध दिसून येतात, असा आरोप करण्यात आला आहे.

शासनाने या अनधिकृत विक्रेत्यांवर परवाना घेण्याची सक्ती केल्यास शासनाचा महसूल वाढ होणार आहे. मात्र, शासन परवानाधारकांना कठोर नियमांमध्ये अडकवत असून, विनापरवाना विक्रेते मोकाट सोडले जात आहेत, असा आरोप सुनील अगरवाल यांनी केला. यावेळी महाड पोलादपूर बिरवाडी परमिट रूम बार असोसिएशनचे अध्यक्ष सुनील अगरवाल, राजेश गायकवाड, साहिल पार्टे, सचिन पवार, अमोल कळमकर, मनोज महाडिक, राकेश पुजारी, इत्यादी पदाधिकारी उपस्थित होते.