महाराष्ट्रातील सुपारीची दुकाने होणार बंद

| मुंबई | प्रतिनिधी |

पाचव्या टप्प्यातील महायुतीच्या सांगता सभेवरून संजय राऊतांनी राज ठाकरेंवर सडकून टीका केली आहे. ज्यांनी तुम्हाला महाराष्ट्रात येऊ देणार नाही असे म्हटले त्यांच्या मांडीला मांडी लावून बसतात, असे म्हणत संजय राऊत यांनी मोदींच्या राज ठाकरेंसोबतच्या सभेवर टीका केली. ते मुंबईत माध्यमांशी बोलत होते. तसेच, अजित पवारांना तुम्ही तुरुंगात टाकणार होता. चक्की पिसिंग, आता पिसिंगच्या ऐवजी किसिंग करतायत, असा ही टोला त्यांनी लगावला.

संजय राऊत म्हणाले, या निवडणुकीनंतर महाराष्ट्रातील काही सुपारीची दुकाने बंद होणार. त्यातील राज ठाकरे यांचे एक दुकान आहे. तीन चार सुपारी शॉप इन पॉलिटिक्स बंद होणार आहेत. त्यातीलच एक हे दुकान आहे. महाराष्ट्रात कोणी येऊ दे, जितक्या सभा घेतील तितकी वाट लागेल. प्रधानमंत्री मुंबईत येऊन इतक्या सभा घेतात म्हणजे तुम्ही दहा वर्षात काही केलं नाही म्हणून येत आहेत. ज्यांनी तुम्हाला शिव्या घातल्या त्यांना मांडीवर घेऊन बसावे लागले नसते. राज ठाकरे ज्यांच्याबद्दल सवाल उठवतात त्यांच्याबरोबरच जातात ही राज ठाकरे यांची खासीयत आहे.

पुढे बोलताना राऊत म्हणाले, अजित पवारांना तुम्ही तुरुंगात टाकणार होता. चक्की पिसिंग, आता पिसिंगच्या ऐवजी किसिंग करताय तुम्ही त्यावर बोला. आपल्या बंगल्यावरती कोणाचा वावर आहे आणि कोण कोण होतं यामध्ये मला पडायचे नाही. आपण सामाजिक जीवनात वावरतो. त्यामुळे गर्दीत लोक येतात फोटो काढतात, असे संजय राऊत म्हणाले.