बागमळा येथे रंगणार डबलबारीचा सामना

रविवारी महालक्ष्मी मंदिरात भजनांचे आयोजन

। चौल । प्रतिनिधी ।

नवरात्रोत्सवानिमित्त बागमळा येथील मंदिरात जागर सुरु आहे. त्यानिमित्ताने विविध धार्मिक व सांस्कृतिक कार्यक्रमांचे आयोजन करण्यात आले आहे. दरम्यान, रविवारी (दि.2) दुपारी दोन वाजता महालक्ष्मीच्या मंदिरात डबलबारी भजनांचे आयोजन करण्यात आले आहे.

नवसाला पावणार्‍या आणि हाकेला धावणार्‍या महालक्ष्मीवर चौलमळा येथील महालक्ष्मीचे भक्त अनंत लक्ष्मण घरत यांची खूप श्रद्धा आहे. दरवर्षी नवरात्रोत्सवात ते डबलबारी भजन व अन्य धार्मिक कार्यक्रम आयोजित करुन नवरात्रोत्सवात रंगत आणत असतात. यावर्षीसुद्धा डबलबारी भजनाचे जंगी सामने आयोजित करण्यात आले आहेत.

रायगड भूषण निलेशबुवा जंगम (मुळे), श्री गोकुळेश्‍वर प्रासादिक भजन मंडळ वेश्‍वी, ता. अलिबाग व नितीनबुवा पाटील (बामणसुरे), श्री राम प्रासादिक भजन मंडळ, मापगाव, ता. अलिबाग यांच्यात डबलबारी भजनांचा सामना रंगणार आहे. जंगमबुवांना वादनकार म्हणून महेश ठाकूर, प्रफुल्ल बानकर यांची साथ लाभणार आहे. तर, विष्णू मगर व्यवस्थापक म्हणून काम पाहणार आहेत. तर, पाटीलबुवांना ॠषिकेश झावरे (भिलजी) हे पखवाजाची साथ देणार आहेत. हा कार्यक्रम यशस्वी करण्यासाठी बागमळा, चौलमळा मित्रमंडळाची जोरदार तयारी सुरु आहेत. या कार्यक्रमास जास्तीत जास्त भजनप्रेमींनी उपस्थित राहावे, असे आवाहन अनंत पाटील यांनी केले आहे.