मोठी बातमी! वसूलीसाठी बीपीसीएल कंपनीवर भेंडखळ ग्रामपंचायतीची जप्तीची कारवाई

बीपीसीएल कंपनीने थकवली 4 कोटी रुपयांची थकबाकी रक्कम

| चिरनेर | प्रतिनिधी |

वारंवार नोटीसा बजावल्यानंतरही बोकडवीरा-उरण येथील मुजोर भारत पेट्रोलियम कॉर्पोरेशन कंपनीने मालमत्ता कराची थकबाकी भरण्याकडे दुर्लक्ष केले. अखेर थकीत असलेल्या 4 कोटी 1 लाख 23 हजार 399 रुपयांच्या वसुलीसाठी भेंडखळ ग्रामपंचायतीने मंगळवारी (दि.19) जप्तीची कारवाई केली आहे.

उरण तालुक्यातील भेंडखळ ग्रामपंचायत हद्दीत भारत पेट्रोलियम कॉर्पोरेशन प्रा.लि. प्रकल्प उभारण्यात आला आहे. ग्रामपंचायतीच्या हद्दीत उभारण्यात आलेल्या या कंपनीची भेंडखळ ग्रामपंचायतीकडे 2016 पासून मालमत्ता कराची एकूण 9 कोटी 2 लाख 71 हजार 722 रुपये थकबाकी आहे. थकबाकीच्या रकमेचा भरणा मुदतीत करण्यासाठी ग्रामपंचायतींने कंपनीला वारंवार नोटीसाही बजावल्या आहेत. त्याचबरोबर 7 नोव्हेंबर रोजी थकबाकी भरण्यासाठी निर्वाणीचा इशारा देताना 30 दिवसात भरणा न केल्यास कंपनीची मालमत्ता जप्त करण्याची नोटीसही बजावली होती. मात्र ग्रामपंचायतीच्या नोटीसीला कंपनीने केराची टोपली दाखवली आहे. भारत पेट्रोलियम कॉर्पोरेशन प्रा.लि. ग्रामपंचायतीने बजावलेल्या नोटिसालाही दाद देत नसल्याने अखेर आज ग्रामविस्तार अधिकारी विनोद मिंडे, सरपंच मंजिता पाटील, उपसरपंच दिपक ठाकूर, सदस्य अजित ठाकूर, अभिजित ठाकूर, अक्षता ठाकूर, संगीता भगत, शितल ठाकूर, लिलेश्वर भगत, स्वाती ठाकूर, स्वाती घरत, प्राची पाटील, सोनाली ठाकूर आणि ग्रामविकास अधिकारी किरण केणी यांच्या नेतृत्वाखाली भेंडखळ ग्रामपंचायतीने जप्तीची कारवाई केली.

संतप्त झालेल्या ग्रामपंचायतीच्या जप्तीच्या कारवाईनंतर मुजोर भारत पेट्रोलियम कॉर्पोरेशन लागलीच वठणीवर आली. टर्मिनल व्यवस्थापक सोमन मुर्मू यांनी नांगी टाकत वरिष्ठांशी चर्चा करून मालमत्ता कराच्या थकबाकीची रक्कम एका महिन्याच्या मुदतीत भरण्याची लेखी पत्राद्वारे हमी दिली आहे. महिन्यात थकबाकीचा भरणा न केल्यास पुन्हा एकदा प्रकल्पावर जप्तीची कारवाई करण्यात येईल, असा इशारा सरपंच मंजिता पाटील यांनी प्रकल्प व्यवस्थापनाला दिला आहे.