भाजप पदाधिकाऱ्याकडून महिला पोलीस अधिकाऱ्याचा विनयभंग

| पुणे | प्रतिनिधी |

 पुणे शहरातील राजकीय वर्तुळात खळबळ माजवणारी घटना समोर आली आहे. शनिवार वाड्याजवळ गर्दीचा फायदा घेत भाजप पदाधिकाऱ्याने महिला पोलीस अधिकाऱ्याचा विनयभंग केल्याची घटना समोर आली आहे. या प्रकरणी भाजप पदाधिकाऱ्याविरोधात गुन्हा दाखल करण्यात आला आहे. भाजपचे पुणे शहर महामंत्री प्रमोद कोंढरे यांच्याविरोधात गुन्हा दाखल करण्यात आला आहे. आरोपी हे आमदार हेमंत रासने यांचे निकटवर्तीय असल्याचे म्हटले जात आहे. मागील 15 दिवसात दुसऱ्या भाजप पदाधिकार्‍याविरोधात गुन्हा दाखल करण्यात आला आहे.

सोमवारी शनिवार वाड्याजवळ केंद्रीय मंत्री नितीन गडकरी यांचा एक कार्यक्रम पार पडला. या कार्यक्रमानंतर कसबा पेठचे आमदार हेमंत रासने काही कार्यकर्त्यांसह आणि बंदोबस्तावर असलेल्या पोलिसांसह चहा पिण्यासाठी जवळील दुकानात गेले होते. त्याच दरम्यान, प्रमोद कोंढरे यांनी गर्दीचा फायदा घेत संबंधित महिला पोलीस निरीक्षकाला दोन वेळा अश्लील आणि लज्जा उत्पन्न करणारा स्पर्श केल्याचा आरोप आहे. यानंतर महिला अधिकाऱ्यांनी थेट वरिष्ठांकडे तक्रार केली. या घटनेचा सीसीटीव्ही फुटेज तपासण्यात आले आहे. त्यानंतर चौकशीला अधिक वेग आला आहे.

पोलिस आयुक्त अमितेश कुमार यांच्या आदेशानुसार प्रमोद कोंढरे यांच्यावर विनयभंगाचा गुन्हा नोंदवण्यात आला आहे. प्रमोद कोंढरे यांच्याविरोधात याआधी देखील विनयभंगाचे गुन्हे दाखल करण्यात आले आहेत. त्यानंतर आता महिला पोलीस अधिकाऱ्याचा विनयभंग केल्याप्रकरणी गुन्हा दाखल करण्यात आला आहे. त्यामुळे कोंढरेंच्या अडचणीत वाढ होणार आहे.