उमेदवारांनी आयोगाच्या सूचनांचे पालन करावे

। रायगड । प्रतिनिधी ।

भारत निवडणूक आयोगाने सार्वत्रिक निवडणूक कालावधीत उमेदवार आणि त्यांच्या प्रतिनिधीने काय करावे काय करू नये याबाबत मार्गदर्शक तत्वे निश्‍चित केली आहेत. या सर्व नियमानुसार प्रचार, त्या अनुषंगाने विविध प्रकारच्या परवानग्या, तसेच प्रचार खर्चाबाबत कार्यवाही करावी. तसेच प्रचारा दरम्यान निवडणूक आयोगाच्या सूचनांचे तंतोतंत पालन करावे, असे प्रतिपादन निवडणूक निर्णय अधिकारी किशन जावळे यांनी केले.

लोकसभा सार्वत्रिक निवडणुकीतील उमेदवार व खर्च प्रतिनिधींचे प्रशिक्षण जिल्हाधिकारी कार्यालयाच्या राजस्व सभागृहमध्ये आयोजित करण्यात आले होते. याप्रसंगी ते बोलत होते. याप्रसंगी निवडणूक निरीक्षक सर्वसाधारण संजीव कुमार झा, निवडणूक खर्च निरीक्षक धीरेंद्रमणी त्रिपाठी, अपर जिल्हाधिकारी सुनील थोरवे, उपजिल्हा निवडणूक अधिकारी स्नेहा उबाळे, जिल्हा खर्च सनियंत्रण समितीचे नोडल अधिकारी राहुल कदम, आदर्श आचारसंहिता कक्षाच्या नोडेल अधिकारी जोत्स्ना पडीयार यांच्यासह राजकीय पक्षाचे उमेदवार व प्रतिनिधी उपस्थित होते.

निवडणूक शासकीय यंत्रणेतील अधिकारी कर्मचारी सर्व राजकीय पक्ष व उमेदवारांसाठी सहकार्याच्या भूमिकेतून काम करतील. प्रशिक्षण काळजीपूर्वक समजून घेवून आयोगाच्या नियम पालनास प्राधान्य द्यावे. निवडणूक विषयक विविध शासकीय विभागाचे समन्वय अधिकारी नेमण्यात आले असून जिल्हा नियंत्रण कक्ष व तक्रार संनियंत्रण कक्ष, माध्यम संनियंत्रण आणि प्रमाणीकरण समिती तसेच खर्च पथक कार्यरत आहेत, असे जावळे यांनी सांगितले. प्रत्येक मतदारसंघाचे सहायक निवडणूक निर्णय अधिकारी यांच्या स्तरावर निवडणुकीच्या अनुषंगाने खर्च पथक नेमण्यात आले आहेत, असेही ते म्हणाले.

निवडणूक प्रचारासाठी वाहने, मिरवणूक, सभा आदी परवानगी अर्ज प्राप्त झाल्यानंतर प्रथम येणार्‍यास, प्रथम प्राधान्य तत्त्वानुसार कार्यवाही करण्यात येईल. सदर प्रचार 6 रोजी सायंकाळी सहा वाजता थांबणार आहे. त्यानंतर इलेक्ट्रॉनिक मीडिया प्रचार करता येणार नाही. परंतू वृत्तपत्रातून मतदानाच्या दिवशी व त्याच्या आदल्या दिवशी जाहिराती जिल्हा माध्यम संनियंत्रण आणि प्रमाणीकरण समितीकडून प्रमाणित करून प्रसिद्ध करता येईल, असे जावळे यांनी सांगितले. यावेळी आदर्श आचारसंहिता, होम व्होटिंग, माँक पोल, ई व्हो एम सरमिसळ, प्रचार खर्चासाठी विविध दरसुची, निवडणूक प्रचार कार्यालय, मतदानसाठी ओळखपत्र अथवा ओळखपत्राचे पर्यायी 12 पुरावे, मतदानाच्या दिवशी उभे करायाचे बूथ, मतदान केंद्र राजकीय प्रतिनिधी याबाबतची माहिती देण्यात आली.