। नेरळ । प्रतिनिधी ।
कर्जत शहरामध्ये 2020 साली शासकीय निधीमधून शहरातील विविध भागासाठी जवळपास 51 सीसीटीव्ही कॅमेरे बसवण्यात आले होते. मात्र त्यापैकी केवळ दहा कॅमेरे कार्यरत असल्याचे निदर्शनास येत आहे. याकडे नगरपालिका प्रशासन आणि पोलीस प्रशासन यांनी समन्वय साधून कॅमेरा पुन्हा कार्यान्वित करावेत, अशी मागणी नागरिककरीत आहे.
कर्जत शहराची वाढ होत असून व्यापक मागील काही वर्षांपासून शहरात नागरीकरण वेगाने वाढले आहे. शहरात अनेक छोट्या-मोठ्या चोर्‍या, छोटे-मोठे गुन्हे घडताना दिसून येत आहेत. यासाठी शहरात होणार्‍या घडामोडी आणि हालचाली यांच्यावर लक्ष ठेवण्यासाठी सीसीटीव्ही कॅमेरे महत्वाचा दुवा ठरत असतात. हि बाब लक्षात घेऊन तत्कालीन नगरसेवक नितीन सावंत यांनी विधान परिषद सदस्य अनिल परब यांच्या निधीमधून एकूण 51 सीसीटीव्ही कॅमेरे खरेदी करण्यात आले होते.
त्यापैकी केवळ 10 सीसीटीव्ही कॅमेरे कार्यरत आहेत. यामुळे शहरात असुरक्षितता जाणवत आहे. शहरातील अनेक रस्त्यांवर सीसीटीव्ही कॅमेरे नसल्याने तपासात अडचणी निर्माण झाल्याचे दिसून येत आहे. अनेक घटनांचा तपास घेताना सीसीटीव्ही महत्वाचे दुवे ठरत आहेत. कर्जत बाजारपेठेतील मुख्य चौकात, नाक्यावर कॅमेरा नसल्याचे निदर्शनास येत आहे. कर्जत शहरात लावलेल्या कॅमेर्‍यांच्या देखभाल दुरुस्तीचे कोणतेही काम कर्जत नगरपरिषदकडे नसून त्याचे पूर्ण सेटअप पोलीस स्टेशन येथे आहे.
कर्जत नगरपरिषदेच्यावतीने कर्जत शहरात 170 कॅमेर्‍याचा प्रकल्प तयार असुन निधीअभावी ही योजना प्रलंबित आहे. कागदोपत्री असलेल्या 51 कॅमेरापैकी फक्त 28 कॅमेरे लावलेले दिसून येत आहेत. तर उर्वरित कॅमेरे नक्की कुठे लावले आहेत. हा सुद्धा संशोधनाचा विषय आहे. तूर्तास 51 कॅमेर्‍याची दुरुस्ती करून कॅमेरा सुस्थितीत व्हावेत ही मागणी जोर धरू लागली आहे.
वैभव गारवे,
मुख्याधिकारी तथा प्रशासक