अलिबागमध्ये चॅम्पियन्स ट्रॉफीला शुभारंभ

| अलिबाग | प्रतिनिधी |

शेतकरी कामगार पक्ष, पुरोगामी युवक संघटना अलिबाग शहर पुरस्कृत व प्रशांत नाईक मित्रमंडळ अलिबाग आयोजित तीन दिवसीय नाईट टेनिस क्रिकेट स्पर्धेचे आयोजन करण्यात आले आहे. शेकापचे जिल्हा चिटणीस ॲड. आस्वाद पाटील यांच्या प्रमुख उपस्थितीत गुरुवारी सायंकाळी क्रीकेट स्पर्धेचा शुभारंभ जल्लोषात झाला. यावेळी शेकापचे ज्येष्ठ नेते शंकरराव म्हात्रे, अलिबागचे माजी नगराध्यक्ष प्रशांत नाईक, रायगड जिल्हा मध्यवर्ती सहकारी बँकेचे माजी मुख्य कार्यकारी अधिकारी प्रदिप नाईक, माजी उपनगराध्यक्षा ॲड. मानसी म्हात्रे, जिल्हा परिषद माजी सदस्या चित्रा पाटील, जिल्हा परिषद माजी संजय पाटील, द्वारकानाथ नाईक, गजेंद्र दळवी, अलिबाग नगरपरिषदेचे माजी नगरसेवक ॲड. गौतम पाटील, वृषाली ठोसर, प्रशांत नाईक मित्रमंडळाचे सर्व पदाधिकारी, सभासद,आदींसह वेगवेगळ्या संघाचे मालक, कर्णधार व खेळाडू मोठ्या संख्येने उपस्थित होते.

यावेळी प्रेक्षणीय सामना पोलीस विरुध्द पत्रकार यांच्यामध्ये झाला. त्यात पत्रकार संघ विजयी ठरला असून मालिकावीर अविनाश घाडगे ठरले. 13 जानेवारीपर्यंत होणाऱ्या क्रिकेट स्पर्धेत मल्हार वॉरिअर्स अलिबाग, त्रिश्राव्या 11 वरसोली, धर्मवीर ग्रुप दिघोडी, आझाद 11 कुरुळ, एसपी सुपर प्लेअर्स आंबेपूर, आद्य सप्लायर्स म्हात्रोळी, हार्दीक वॉरिअर्स भोनंग, एम.डी. वॉरिअर्स थळ, सिया वॉरिअर्स नागाव, सरपंच पिंट्या गायकवाड मित्र मंडळ चोंढी, कुबेर 11 अलिबाग, अक्षया हॉटेल 11 अलिबाग, एस.पी. भार्गवी 11 अलिबाग, सिध्दी कन्स्ट्रक्शन कुरुळ, मी हाय कोळी रिसॉर्ट नागाव, आर.सी. ग्रुप अलिबाग हे 16 संघ सहभागी झाले आहेत. अंतिम सामान्यनंतर स्पर्धेत प्रथम क्रमांक मिळविणाऱ्या संघाला अलिबाग चॅम्पियन चषक देऊन गौरविण्यात येणार आहे. या संघाला दोन लाख रुपये व चषक, द्वितीय क्रमांकाला एक लाख रुपये व चषक, तृतीय व चतुर्थ क्रमांकाला प्रत्येकी 50 हजार रुपये व चषक देऊन सन्मानित केले जाणार आहे. सर्वोत्कृष्ट फलंदाज व गोलंदाजाला एलईडी टीव्ही, मालिकावीराला दुचाकी दिली जाणार आहे. तसेच विजेता संघ मालक, उपविजेता संघ मालकाला आकर्षक भेटवस्तू देण्यात येणार आहे. प्रेक्षकांना ही स्पर्धा घरबसल्यादेखील ऑनलाईन पाहण्याची व्यवस्था करण्यात आली आहे.