तळा तालुक्यातील सरपंच आरक्षणात फेरबदल

। तळा । प्रतिनिधी ।

तळा तालुक्यात 2025-30 या कालावधीसाठी 25 ग्रामपंचायतीमध्ये अनुसूचित जातीसाठी 2 जागा, अनुसूचित जमातीसाठी 4 जागा, नागरिकांच्या मागास प्रवर्गासाठी 7 जागा, सर्वसाधारणसाठी 12 जागा असे आरक्षण निश्‍चित करण्यात आले होते. वाशीहवेली ग्रामपंचायतीचे सरपंचपद हे सर्वसाधारण महिला म्हणून आरक्षित करण्यात आले होते. मात्र, त्यावर माजी सरपंच जगन्नाथ तांडेल यांनी लेखी हरकत नोंदवली आहे. मागील पाच वर्षे हेच आरक्षण असल्याने 2025-30 करिता त्यामध्ये फेरबदल करून सर्वसाधारण जागेसाठी हि जागा आरक्षित करावी, अशी लेखी मागणी त्यांनी केली होती. त्या अनुषंगाने सरपंच पदाचे आरक्षण पुन्हा निश्‍चित करण्यासाठी तळा तहसील कार्यालयात शुक्रवारी (दि.2) सभा आयोजित करण्यात आली होती.

सर्वसाधारण जागेसाठी 12 जागा आरक्षित करण्यात आल्या होत्या. त्यामध्ये भानंग, गिरणे, वानस्ते, रहाटाड यांचे मागील आरक्षण सर्वसाधारण महिला असल्याने त्या ठिकाणी सर्वसाधारण आरक्षण लागू करण्यात आले. तर, वाशीहवेली येथील आरक्षण सर्वसाधारण झाल्याने सर्वसाधारण महिला आरक्षणासाठी गिरणे आणि वानस्ते या दोन ग्रामपंचायतीमध्ये चिठ्ठी उडविण्यात आली. त्या चिठ्ठीमध्ये गिरणे ग्रामपंचायतीचे नाव आल्याने त्या ग्रामपंचायतीच्या आरक्षणात फेरबदल झाला असून सर्वसाधारण महिलेसाठी सरपंचपद आरक्षित करण्यात आले आहे.