पुनर्विकासाच्या बैठकीत गोंधळ

मारहाणीने न्यू पनवेलमधील सोसायटीत तणाव

| पनवेल | प्रतिनिधी |

सिडको वसाहतीतील जुन्या इमारतींच्या पुनर्विकासाचा मुद्दा तापत असतानाच न्यू पनवेलमधील एका गृहनिर्माण सोसायटीच्या बैठकीत मोठा गोंधळ उडाला. पुनर्विकासाच्या अटी व विकासकाच्या निवडीवरून सभासद आणि व्यवस्थापन समिती यांच्यात वाद वाढत जाऊन धक्काबुक्की व मारहाणीची घटना घडली. याप्रकरणी दोन्ही बाजूंनी खांदेश्वर पोलीस ठाण्यात परस्परविरोधी तक्रारी दाखल करण्यात आल्या आहेत.

मिळालेल्या माहितीनुसार, न्यू पनवेल येथील सेक्टर 14 मधील अम्रितवेल को.ऑ. हौसिंग सोसायटी (इमारत क्रमांक ई-1/19) येथे इमारतीच्या पुनर्विकासाबाबत चर्चा करण्यासाठी सर्वसाधारण सभा आयोजित करण्यात आली होती. बैठकीदरम्यान पुनर्विकासाच्या अटी, प्रक्रिया तसेच विकासकाच्या निवडीवरून सभासद आणि सोसायटी व्यवस्थापन समिती यांच्यात तीव्र शाब्दिक वाद झाला. वाद वाढत गेल्यानंतर परिस्थिती तणावपूर्ण झाली आणि काही वेळातच धक्काबुक्कीची घटना घडली. यादरम्यान काही बाहेरील तरुण बैठकीत घुसल्याचा आरोप रहिवाशांकडून करण्यात आला आहे. या तरुणांनी उपस्थित काही नागरिकांना मारहाण केल्याचा आरोपही करण्यात आला असून, त्यामुळे सभेत एकच गोंधळ उडाला.

या घटनेत सोसायटीतील दोन रहिवासी जखमी झाले असून, त्यांना उपचारासाठी पनवेलमधील रुग्णालयात दाखल करण्यात आले आहे. तसेच, सोसायटी समिती आणि विकासक यांच्यात आर्थिक व्यवहार झाल्याचा संशय काही रहिवाशांनी व्यक्त केला असून, या प्रकरणाची सखोल चौकशी करण्याची मागणी करण्यात येत आहे. घटनेनंतर परिसरात काही काळ तणावाचे वातावरण निर्माण झाले होते. दोन्ही बाजूंनी एकमेकांविरोधात तक्रारी दाखल केल्या असून, पोलिसांकडून या संपूर्ण घटनेची चौकशी सुरू असल्याची माहिती मिळत आहे.