अनधिकृत इमारत घोषित केलेल्या जागेवर पुन्हा पडलेल्या इमारतीचे बांधकाम; राजाश्रय कुणाचे?

| पेण | वार्ताहर |
13 मे 2022 रोजी फणसडोंगरी परिसरातील बेलसरे गल्लीच्या वरच्या भागास असणारी दोन मजल्याची इमारत पत्त्याच्या बंगल्याप्रमाणे खाली पडली आणि एकच हाहाकार माजला. त्यानंतर प्रशासन खडबडून जागे झाले. तहसीलदार स्वप्नाली डोईफोडे, पोलीस निरीक्षक देवेंद्र पोल यांच्यासह महसूल व पोलीस खात्याचे कर्मचारी घटनास्थळी पोहोचले. सुदैवाने कोणतीच जीवितहानी झाली नाही. त्यावेळी नगरपालिकेचे बांधकाम अभियंता विनायक बनसोडे व ओ.एस. राजाराम नरुटे घटनास्थळी पोहोचले व त्यांनी सदरील इमारत अनधिकृत असल्याची घोषणा प्रसार माध्यमांसमोर केली.

त्यावेळी प्रसार माध्यमांनी विनायक बनसोडे यांना विचारणा केली होती की, अनधिकृत बांधकाम करणार्‍यांविरुद्ध कारवाई होईल का? तेव्हा त्यांनी कारवाई करणार असल्याचे सांगितले. पण, प्रत्यक्षात ती झाली की नाही, हे स्पष्ट होण्याच्या आतच त्याच ठिकाणी नव्याने लोखंडी आयबीमचा उपयोग करून दोन मजल्यांच्या इमारतीचे बांधकामझाले आहे. यामुळे या बांधकामालानक्की वरदहस्त कुणाचा आहे, लोकप्रतिनिधींचा की अधिकार्‍यांचा, अशी चर्चा सुरू झाली आहे.

महत्त्वाची बाब म्हणजे, हे अनधिकृत बांधकाम सुरू आहे, त्या शेजारी गृहनिर्माण व्यवसाय करणारे महेंद्र बाफणा यांच्यादेखील इमारतीचे बांधकाम सुरू आहे. त्या इमारतीचे बांधकाम होताना त्यांनी त्या जागेभोवती संरक्षक भिंत बांधली असून, त्या संरक्षक भिंतीचादेखील वापरही अनधिकृत इमारत उभारण्यासाठी केला गेला होता. हे अनधिकृत बांधकाम करणार्‍यांचे चुलते पण नगरपालिकेचे माजी सभापती असल्याचीही चर्चा आहे.

ज्या वेळेला 13 मे रोजी ही इमारत पडली, त्या वेळेला या इमारतीचा पंचनामा पेणचे तलाठी सुरेंद्र ठाकूर यांनी करून तहसील कार्यालयात जमादेखील केला होता. त्याच वेळेला नगरपालिकेने ही इमारत अनधिकृत असल्याची घोषणा केली होती. असे असतानादेखील आज ही दोन मजल्याची इमारत उभी राहात आहे. भविष्यात जर पुन्हा ही इमारत पडून दुर्दैवी घटना घडल्यास आणि दुर्दैवाने जीवितहानी झाल्यास त्याला जबाबदार कोण, असा सवाल पेणकर विचारत आहेत.

या इमारतीबाबत बांधकाम अभियंता विनायक बनसोडे यांना घटनास्थळी पाठवून रीतसर माहिती घेण्यात येईल. जर बांधकाम अनधिकृत असेल, तर त्यावर कायदेशीर कारवाई केली जाईल. जीवन पाटील, मुख्याधिकारी, पेण नगरपालिका