| खोपोली | प्रतिनिधी |
रायगड जिल्ह्यातील खोपोली येथे शिंदे गटाच्या शिवसेनेच्या नवनिर्वाचित नगरसेविका मानसी काळोखे यांचे पती मंगेश काळोखे (45) यांची शुक्रवारी, (दि. 26) सकाळी सात वाजता निर्घृण हत्या करण्यात आली. मंगेश काळोखे हे आपल्या मुलींना शाळेत सोडून घरी परतत असताना खोपोलीतील साईबाबा नगर परिसरात जया बारजवळ तलवार आणि चॉपरने अज्ञातांनी त्यांच्या डोक्यावर कोयता, कुऱ्हाड आणि तलवारीने सपासप वार करुन अक्षरशः चिंधड्या उडवल्या. हल्ल्यानंतर आरोपी फरार झाले आहेत. राजकीय वैमनस्यातून ही हत्या करण्यात आल्याचा संशय व्यक्त होत आहे. भरदिवसा घडलेल्या या हत्येच्या घटनेने खळबळ उडाली आहे. दरम्यान, मयत मंगेश काळोखे यांचा पुतण्या राज काळोखे यांनी दिलेल्या तक्रारीनुसार, राष्ट्रवादी काँग्रेस अजित पवार पक्षाचे रवींद्र देवकर यांची दोन मुले दर्शन आणि धनेश व त्यांचे अंगरक्षक तसेच खुनाच्या कटासाठी सहकार्य केल्याचा आरोप केल्याने राष्ट्रवादीचे जिल्हाध्यक्ष सुधाकर घारे, प्रवक्ता भरत भगत यांच्यावर गुन्हा दाखल करण्यात आला आहे.
मंगेश काळोखे हे आपल्या मुलींना शाळेत सोडून घरी परतत होते. यावेळी एका अज्ञात वाहनातून चार ते पाचजण उतरले. त्यांनी मंगेश यांच्या गाडीसमोर स्वतःची गाडी आडवी घातली आणि त्यांच्यावर तलवारी व चॉपरने हल्ला केला. या भीषण हल्ल्यात मंगेश काळोखे यांचा जागीच मृत्यू झाला. या हत्येमागे राजकीय वादाची पार्श्वभूमी असल्याचा संशय व्यक्त केला जात आहे. मानसी काळोखे या साईबाबा नगर प्रभागातून दुसऱ्यांदा निवडून आल्या आहेत. त्यांनी याच निवडणुकीत प्रतिस्पर्धी देवकर यांच्या पत्नीचा पराभव केला होता. काळोखे आणि देवकर या दोन कुटुंबांत आणि त्यांच्या पक्षांमध्ये गेल्या 15-20 वर्षांपासून वाद सुरू असल्याचे समजते. निकाला दिवशी देखील त्यांच्यात किरकोळ वाद झाला होता.
काळोखे यांच्या नातेवाईकांनी पोलिसांवर गंभीर आरोप केले आहेत. गेल्या दोन दिवसांपासून मंगेश यांच्यावर पाळत ठेवली जात होती आणि एक संशयास्पद गाडी परिसरात फिरत होती. याबद्दल पोलिसांना कल्पना देऊनही त्यांनी दुर्लक्ष केले, असा आरोप नातेवाईकांनी केला आहे.
मंगेश काळोखे यांच्या हत्येची बातमी वाऱ्यासारखी पसरल्याने मोठा जनसमुदाय खोपोली शहरात दाखल झाला. दरम्यान, आरोपींना तात्काळ अटक करा, अशी मागणी खोपोलीकरांनी करून मृतदेह ताब्यात घेण्यास नकार दिला आहे. ही घटना घडत असताना काळोखे यांना वाचविण्यासाठी मारेकऱ्यांना घाबरून कोणीही पुढे न आल्याने एक तरुण कार्यकर्ता सर्वांच्या मदतीला जाणारा मंगेश काळोखेचा राजकरणात बळी गेला असल्याची प्रतिक्रिया उमटत आहे. या घटनेने खोपोली शहर हादरून गेले आहे. आतापर्यंतच्या इतिहासात खोपोलीचे राजकारण इतक्या खालच्या थराला कधीही गेले नव्हते. मात्र, या घडनेने बीड जिल्ह्यात घडणाऱ्या घटनांचीच प्रचिती खोपोलीतील जनतेला आली.
या घटनेमुळे पोलीस प्रशासनही हादरले असून, या घटनेनंतर पोलीस अधीक्षक आचल दलाल, अपरअधीक्षक अभिजित शिवथरे, गुप्तहेर स्थानिक गुन्हे अन्वेषण शाखेचे पोलीस निरीक्षक मिलिंद खोपडे यांनी तपास सुरू केला आहे. तपास यंत्रणेसाठी फॉरेन्सिक लॅबची टीम घटनास्थळी दाखल झाली आहे. या घटनेला गावातील विरोधकच जबाबदार असल्याची चर्चा सुरू आहे. त्यामुळे तपासाअंती या प्रकरणाचा उलगडा होणार आहे.
राष्ट्रवादीकडून प्लॅनिंग मर्डर : आ. थोरवे
मंगेश काळोखे हा निष्ठावान शिवसैनिक होता. राष्ट्रवादी काँग्रेसचे सुधाकर घारे, भरत भगत, रवी देवकर यांनीच राजकीय वादातून सूडबुद्धीने प्लॅनिंग मर्डर केल्याचा आरोप शिवसेना शिंदे गटाचे कर्जतचे आमदार महेंद्र थोरवे यांनी केला आहे. त्यांच्या आरोपामुळे खोपोलीसह रायगड जिल्ह्यातील राजकीय वातावरणात खळबळ उडाली असून, पोलीस या घटनेचा कशा पद्धतीने तपास करतात याकडे सर्वांचे लक्ष लागले आहे.
पोलीस ठाण्याबाहेर ठिय्या
महिला आणि युवकांनी खोपोली पोलीस ठिय्या आंदोलन केल्याने पोलीस तपासात सहकार्य करण्याची विनंती पोलीस अधीक्षक आचल दलाल यांनी केली. मात्र, महिलांनी आक्रमक पवित्रा घेत दोन वेळा महामार्ग अडवला. यावेळी महिला पोलीस आणि आंदोलनकर्त्या महिलांमध्ये शाब्दिक वाद झाल्यावर वातावरण काहीकाळ ताणावपूर्व होते.
पुतण्याने दिली तक्रार
मयत मंगेश काळोखे यांचा पुतण्या राज काळोखे यांनी दिलेल्या तक्रारीनुसार, मुलींना शिशुमंदिर स्कूल येथे सोडून परत येत असताना सकाळी सात वाजताच्या सुमारास जया बारसमोरील चौकात, विहारी खोपोली येथे आले. यावेळी दर्शन रवींद्र देवकर, सचिन संदीप चव्हाण व इतर तीन इसमांनी अगोदर माझे चुलते मंगेश काळोखे उर्फ आप्पा यांचा पाठलाग करुन त्यांना जमिनीवर खाली पाडले व त्यांच्यावर तलवार, कोयता व कुऱ्हाडीने वार करुन जिवे ठार मारले आहे.
सुधाकर घारेंसह तिघांवर खुनाच्या कटाचा आरोप
रवींद्र परशुराम देवकर यांच्यासह धनेश देवकर, सुधाकर परशुराम घारे व भरत भगत यांनी या खुनाचा कट रचला आहे. तरी रवींद्र परशुराम देवकर, दर्शन रवींद्र देवकर, धनेश रवींद्र देवकर, सचिन संदीप चव्हाण, 1 ते 4 रा. साईबाबानगर, रहाटवडे, खोपोली, ता. खालापूर, जि. रायगड, सुधाकर परशुराम धारे, रा.सांगवी, ता.कर्जत, जि.रायगड, भरत भगत, रा. अवसरे, ता. कर्जत, जि. रायगड, रवींद्र देवकर याचा बाउंसर व इतर अनोळखी तीन इसमांनी पूर्ववैमनस्यातून व राजकीय वादातून माझे चुलते मंगेश सदाशिव काळोखे ऊर्फ आप्पा, वय-45 वर्षे, रा. साईबाबानगर, रहाटवडे, खोपोली, ता. खालापूर, जि. रायगड यांना कट रचून, तलवार, कोयता व कुऱ्हाडीने वार करुन जिवे ठार मारल्याची तक्रार मंगेश काळोखे यांचा पुतण्या राज काळोखेने दिली आहे.