झुंझार पोयनाड आयोजित क्रिकेट स्पर्धा

| पोयनाड | प्रतिनिधी |

झुंझार युवक मंडळ पोयनाडच्या वतीने देशाच्या 77 व्या प्रजासत्ताक दिनाच्या निमित्ताने सोमवार दि. 26 जानेवारी रोजी झुंझारच्या क्रीडांगणावर टेनिस बॉल क्रिकेट स्पर्धेचे आयोजन करण्यात आले होते. ह्या स्पर्धेत पोयनाड विभागातील पोलिसांच्या संघा सह पोयनाड व्यापारी असोसिएशनचा संघ, पोयनाड विभागातील महावितरण कंपनीचा संघ व झुंझार वॉरियर्स अशा चार संघानी सहभाग घेतला होता.

स्पर्धेचे उद्घाटन पोयनाडच्या तलाठी कार्यालयाचे माजी मंडळ अधिकारी तथा महाड तालुक्याचे विद्यमान नायब तहसीलदार महेश लक्ष्मण निकम व पोयनाड पोलीस स्टेशनचे एपीआय विजयकुमार देशमुख यांच्या हस्ते करण्यात आले. स्पर्धा प्रथम साखळी व त्यानंतर बाद फेरीनुसार खेळविण्यात आली असून, स्पर्धेच्या अंतिम सामन्यात पोयनाडच्या पोलिसांच्या संघाने पोयनाड व्यापारी असोसिएशनच्या संघाचा 18 धावांनी पराभव करत सर्धेत अंतिम विजयी होण्याचा मान मिळवला आहे. अंतिम सामन्यात पोयनाड पोलीस स्टेशनचे एपीआय विजयकुमार देशमुख यांच्या नेतृत्वाखाली खेळणाऱ्या पोयनाड पोलिसांच्या संघाने प्रथम फलंदाजी करतांना सहा षटकांच्या समाप्तीच्या नंतर आठ गडी गमावत 48 धावा काढल्या, पोयनाड व्यापारी असोसिएशनच्या संघाने सह षटकात 7 गडी गमावत 30 धावाच केल्या. स्पर्धेत सर्वोत्कृष्ट कामगिरी करणाऱ्या पोयनाड व्यापारी असोसिएशनच्या प्रीत चंद्रप्रकाश जैन याला मालिकावीर, उत्कृष्ट फलंदाज पोयनाड पोलीस संघाचे वितेश कवळे तर उत्कृष्ट गोलंदाज म्हणून अमोल घरत यांना चषक देऊन गौरविण्यात आले. बक्षीस वितरणाच्या कार्यक्रमासाठी झुंझारचे सचिव किशोर तावडे, खजिनदार दिपक साळवी, क्रीडा प्रमुख नंदकिशोर चवरकर, सदस्य अजय टेमकर सुजित साळवी, पोयनाड पोलिस स्टेशनचे एपीआय विजयकुमार देशमुख, पोयनाड व्यापारी असोसिएशनचे सदस्य किशोर जैन, प्रदिप जैन, ऋषिकुमार जैन, आर.डी जैन, अक्षय अग्रवाल, विश्वकुमार नाईक, शैलेंद्र गायकवाड, ॲड.पंकज पंडित यांच्या सह पोयनाडचे व्यापारी व ग्रामस्त मोठ्या संख्येने उपस्थित होते.