बल्लाळेश्वराच्या दर्शनासाठी शिस्तबद्ध रांगा; व्यापार व्यवसायाला मिळाली मोठी उभारी
| पाली/बेणसे | प्रतिनिधी |
नववर्षातील पहिल्या अंगारक संकष्टी चतुर्थीला मंगळवारी (दि.10) अष्टविनायकांपैकी एक तीर्थक्षेत्र असलेल्या बल्लाळेश्वराच्या दर्शनासाठी भाविकांनी रांगा लावल्या होत्या. यावेळी छोट्या-मोठ्या व्यावसायिकांचा धंदा तेजीत होता. यानिमित्ताने व्यापार व्यवसायाला देखील मोठी उभारी मिळाल्याचे दिसून आले.
रायगड जिल्ह्यासह मुंबई, ठाणे, पुणे व राज्यातून पालीत हजारोच्या संख्येत भाविक व त्यांची वाहने दाखल झाली होती. त्यामुळे वाहतूक कोंडी देखील झाली होती. भाविकांची मोठी गर्दी असल्याने येथील दुकानदार व हॉटेल व्यावसायिकांचा धंदादेखील तेजीत होता. परिसरातील दुकाने, हॉटेल व लॉज ग्राहकांनी गजबजले आहेत. येथील हॉटेल, खेळण्याची व शोभिवंत वस्तुंची दुकाने, नारळ, हार, फुले व पापड मिरगुंड, कडधान्य विक्रेते, प्रसाद व पेढेवाले सुखावले होते. मंदिर परिसरात मोठी वर्दळ होती. भाविकांच्या सोयीसाठी बल्लाळेश्वर देवस्थान ट्रस्टच्या वतीने चोख व्यवस्था करण्यात आली होती.
वाहतूक कोंडी
वाहतूक कोंडी सोडविण्यासाठी नाक्यावर वाहतूक पोलीस तैनात असूनदेखील अरुंद रस्ते, अवजड वाहतूक, एकेरी वाहतुकीवरुन दुहेरी वाहतूक आणि वाहनचालकांनी वाहतुकीचे नियम न पाळल्याने व रस्त्याच्या दुतर्फा अवैधरित्या पार्क केलेली वाहने यांमुळे पोलिसांना या वाहतूक कोंडीवर नियंत्रण मिळविणे अवघड होते. बल्लाळेश्वर मंदिर परिसरात बल्लाळेश्वर देवस्थानचे सुरक्षा रक्षकदेखील वाहतूक कोंडी सोडविण्यासाठी तैनात आहेत. मात्र, त्यांना सर्वच ठिकाणची कोंडी सोडवणे शक्य होत नाही.
देवस्थान ट्रस्टने भाविकांसाठी विशेष सोयीसुविधा उपलब्ध केल्या आहेत. देवस्थानचे दोन भक्त निवास नाममात्र दरात भाविकांसाठी उपलब्ध केले आहेत. त्यामुळे दर्शनासाठी येणार्या भाविकांची कुठल्याही प्रकारची गैरसोय होत नाही.
जितेंद्र गद्रे
अध्यक्ष, बल्लाळेश्वर देवस्थान ट्रस्ट, पाली
वर्षातील पहिली अंगारक संकष्टी चतुर्थी असल्याने तसेच मोठ्या प्रमाणात भाविक बल्लाळेश्वराच्या दर्शनासाठी आले होते. भाविकांची वर्दळ असल्याने व्यवसायदेखील चांगला होत आहे.
मनोज मोरे
व्यावसायिक