पीएनपी संकुलात रंगणार प्रभाविष्कार

19 ते 22 डिसेंबरदरम्यान विविध गुणदर्शनाचे कार्यक्रम

| अलिबाग | प्रतिनिधी |

अलिबाग तालुक्यातील वेश्वी येथील पीएनपी शैक्षणिक संकुलाद्वारे ‌‘प्रभाविष्कार‌’ या सांस्कृतिक सोहळ्याचे दि. 19 ते 22 डिसेंबर या कालावधीत आयोजन करण्यात आले आहे. विद्यार्थ्यांच्या सुप्त गुणांचा ठाव घेऊन त्यांच्या अंतर्मनाचा वेध घेणारा व त्याचबरोबर सर्वांगीण विकासाला वाव देणाऱ्या कार्यक्रमाचे सादरीकरण या सोहळ्यात होणार आहे.

पीएनपी एज्युकेशन सोसायटीच्या वेश्वी येथील भव्य दिव्य संकुलात शुक्रवार (दि. 19) ते सोमवार (दि. 22) या चार दिवसांच्या कालावधीत प्रभाविष्कार सोहळा सायंकाळी सहा ते रात्री दहा या वेळेत रंगणार आहे. दि. 19 डिसेंबरला पहिल्या दिवशी सीबीएससी होली चाईल्ड शाळा, दि. 20 डिसेंबरला होली चाईल्ड इंग्रजी माध्यम शाळा, दि. 21 डिसेंबर प्राथमिक, माध्यमिक मराठी शाळा व बीएड महाविद्यालयातील विद्यार्थ्यांचा विविध गुणदर्शन कार्यक्रम होणार आहे. दि. 22 डिसेंबरला कनिष्ठ व वरिष्ठ महाविद्यालयातील विद्यार्थी कलागुणांचे सादरीकरण करतील आणि महागरबा खेळला जाणार आहे.

वेगवेगळ्या क्षेत्रातील मान्यवरांच्या उपस्थितीत सोहळा पार पडणार आहे. भव्यदिव्य स्वरुपात होणाऱ्या विद्यार्थ्यांचा कौतुक सोहळा पाहण्यासाठी आवर्जून उपस्थित राहावे, असे आवाहन पीएनपी संकुलाच्यावतीने करण्यात आले आहे.