खालापूरात सायकलथॉन स्पर्धा उत्साहात

शेकडो सायकलपटूंचा सहभाग

| खोपोली | प्रतिनिधी |

भारत सरकारच्या निर्देशानुसार व फिट इंडिया मोहिमेअंतर्गत रायगड जिल्हा पोलीस आयोजित सायकलथॉनचे आयोजन खालापूर तालुका पोलीस यंत्रणेच्या माध्यमातून करण्यात आले होते. या अभूतपूर्व अशा सायकल स्पर्धेच्या उद्घाटनानिमित्त रायगड जिल्ह्याच्या पोलीस अधीक्षिका आंचल दलाल यांची विशेष उपस्थिती होती. पळस दरी ते हॉलिडे बँक्वेट हॉल अंजरूण या दरम्याच्या 10 किलोमीटर अंतराच्या स्पर्धेला त्यांनी हिरवा झेंडा दाखवला.

खेळीमेळीच्या वातावरणात संपन्न झालेल्या या सायकलथॉन स्पर्धेत अविनाश पोळ यांनी 20.22 सेकंदात 10 किलोमीटरचे अंतर पार करून प्रथम क्रमांक मिळवला, तर आर्यन सणस आणि अविनाश पाटील यांनी काही सेकंदाच्या फरकाने अनुक्रमे दुसरा व तिसरा क्रमांक पटकावला. त्याच बरोबर वय वर्षे 6 ते 60 पेक्षा अधिक वयाच्या सायकलपटूंनी स्पर्धेत चुरस दाखविल्याबद्दल सर्वांना प्रशस्तीपत्रक देण्यात आले.

यावेळी खालापूरचे उपविभागीय पोलीस अधिकारी डॉ. विशाल मेहुल, कर्जतचे उप विभागीय पोलीस अधिकारी राहुल गायकवाड, निवासी उपविभागीय पोलीस अधिकारी तानाजी नारनवर, वरिष्ठ पोलीस निरीक्षक सचिन पवार यांच्यासह सचिन हिरे, संजय बांगर, संदीप भोसले, सरिता चव्हाण, हॉलिडे बँक्वेट हॉलचे मालक अब्दुल अजीज बारुदगर व अझीम कर्जीकर यांनी सायकलथॉन स्पर्धेच्या आयोजनात विशेष भूमिका बजावली. तसेच, स्पर्धेदरम्यान हेल्प फाऊंडेशन, सायकल इंडिया, यशवंती हायकर्स, खोपोली व्यापारी असोसिएशन व करियर कोचिंग क्लासेस इत्यादी संस्थांचा यावेळी सन्मान करण्यात आला.