पेण खारेपाट विकास संकल्प संघटनेचे उपोषण
। पेण । वार्ताहर ।
पेण खारेपाटात पाण्याविना जनतेचे हाल सुरू आहेत. त्यामुळे हेटवणे ते शहापाडा हे पाईपलाईनचे काम लवकरात लवकर व्हावे म्हणून सर्व परीने प्रयत्न सुरू आहेत. परंतु अधिकारी वर्ग फक्त तारीख पे तारीख देउन चालढकल करत आहेत. त्यामुळे संतापलेल्या पेण खारेपाट विकास संकल्प संघटनेने मंगळवारी ( 24 मे) तहसिल कार्यालयासमोर बेमुदत उपोषणाला सुरूवात केलेली आहे.
माजी आ. धैैर्यशील पाटील यांच्या अध्यक्षतेखाली पेण पंचायत समिती येथे 18 एप्रिल रोजी बैठक घेण्यात आली होती. या बैठकीमध्ये प्रभारी असलेले कार्यकारी अभियंता विजय कुमार सूर्यवंशी व अभियंता ए.डी.कोठेकर यांनी 15 दिवसाच्या आत म्हणजेच 3 मे पर्यंत पाणी शहापाडा च्या धरणात पोहोचले जाईल असा शब्द दिला त्यानंतर आ.रविशेठ पाटील यांनी प्रांत कार्यालय पेण येथे 12 मे रोजी घेतलेल्या बैठकीमध्ये अभियंता ए.डी.कोठेकर यांनी सांगितले की, येत्या आठ दिवसात म्हणजे 20 मे पर्यंत काम पूर्ण होईल. फक्त तीन दिवसाचे काम अपुरे राहिलेले आहे. तर पेण खारेपाट विकास संकल्प संघटनेने 10 मार्च रोजी जलसंपदाविभागाशी संपर्क करून कामाचा तपशिल घेतलेला होता. त्यावेळेला देखील काम 15 ते 20 दिवसात काम पूर्ण करू असे सांगितले होते. परंतु आजच्या घडीला देखील हेटवणे ते शहापाडा पाईपलाईनचे काम पूर्ण झालेले नाही.
अखेर आज पेण खारेपाट विकास संकल्प संघटनेने तहसिल कार्यालयासमोर बेमुदत उपोषणाला सुरूवात केलेली आहे. व या उपोषण कर्त्यांनी वेगवेगळया चार मागण्या शासनासमोर ठेवल्या आहेत. उपोषण कर्त्ये सकाळी 10ः30 वाजल्या पासून तहसिल कार्यालयाच्या दारात उपोषणाला बसले आहेत मात्र तहसिल कार्यालयात ना तहसिलदारांचा पत्ता, ना नायब तहसिलदारांचा पत्ता बिचारे उपोषण कर्त्ये मायबाप सरकारच्या दारात आपले गर्हाणे घेउन बसलेत. पाणी पाणी देता का पाणी…अशी आर्तसाद मायबाप सरकारला घालत आहेत. या उपोषण कर्त्यांमध्ये राजन झेमसे, नंदा म्हात्रे, प्रकाश माळी, ठाकूर, अदी कार्यकत्यांचा समावेश आहे.