कारखान्यातील मूर्तिकारांची दमछाक
| पनवेल | प्रतिनिधी |
गणेशोत्सव काही दिवसांवर येऊन ठेपला आहे. गणेशाच्या मूर्तिवर शेवटचा हात फिरवण्यात मूर्तिकार व्यस्त आहेत. त्यातच शाडूच्या मूर्तिंना अचानक मागणी वाढल्याने मुंबई-गोवा महामार्गावर कर्नाळा अभयारण्याशेजारी असलेल्या युसूफ मेहेर आलीसेंटरमधील कारखान्यातील मूर्तिकारांची दमछाक होत आहे. पावसामुळे मुर्ती सुकवण्यासाठी देखील मोठी कसरत करावी लागत आहे.
ग्रामीण भागाच्या सशक्तिकरणासाठी स्थापित युसूफ मेहरअली सेंटरच्या कर्नाळा अभयारण्य परिसरातील कारखान्यात 2019 पासून शाडूमातीपासून गणेशाच्या आकर्षक मूर्ती तयार करण्याचे काम करण्यात येत आहे. सुरवातीला 20 मुर्त्यांपासूनची सुरूवात आता 300 मुर्त्यांवर पोहचली आहे. शासनाकडून पर्यावरण पूरक गणेशोत्सव साजरा करण्याचे आवाहन करण्यात आल्यामुळे नागरिकांमध्ये पर्यावरण प्रति जागृती झाली आहे. त्यामुळे शाडूच्या मूर्तिच्या मागणीत दिवसेंदिवस वाढ होत असल्याची माहिती मूर्तिकार राजेंद्र ठाकूर यांनी दिली आहे. सध्या ठाकूर आणि त्यांचे तीन सहकारी एप्रिल महिन्यापासूनच कारखान्यात मूर्ती घडवण्याचे काम अविरतपणे करत आहेत. युसूफ मेहेर अली सेंटरमध्ये सध्या 8 इंचापासून दोन फूट उंची पर्यंतच्या मूर्ती घडवण्यात आल्या आहेत. 800 रुपयांपासून साडेचार हजारांपर्यत या मूर्तिची विक्री कारखान्यात करण्यात येत आहे.
मागणी नुसार रंग
शाडूच्या मूर्ती सहास आकर्षक रंगात रंगवल्या जात नाहीत. मात्र, काही गणेश भक्त करत असलेल्या मागणी मुळे जादा दर आकारून गणेश भक्तांची मागणी पूर्ण करण्यात येत आहे.
मातीची किंमत वाढली
शाडूच्या मातीची किंमत यंदा वाढली आहे. मागील वर्षी 210 रुपयाला 25 किलो मिळणारी मातीची गोण यंदा 250 रुपयाला मिळत आहे
युसूफ मेहेर अली सेंटरमध्ये तयार होणाऱ्या मूर्तिना परदेशात देखील मागणी आहे. मात्र, पॅकिंग करताना येणाऱ्या अडचणींमुळे सध्या परदेशात मूर्ती पाठवण्यात उडचणी निर्माण होत आहेत.
प्रकाश तांबे,
मूर्तिकार