समाजकल्याण उपायुक्त शासकीय वसतिगृहात मुक्कामाला

। नवी मुंबई । प्रतिनिधी ।
समाजकल्याण मुंंबई विभागाच्या प्रादेशिक उपायुक्त वंदना कोचुरे यांनी पनवेल येथील शासकीय मुलींचे वसतिगृह येथे भेट देऊन स्वत: मुक्काम करुन वसतीगृहातील विद्यार्थीनींशी मनमोकळ्या गप्पा मारल्या. तसेच त्यांच्या अडीअडचणी समजून घेतल्या.

राज्याच्या समाज कल्याण विभागामार्फंत राबविण्यात येणार्‍या शासकीय वसतिगृह योजनेबाबत विद्यार्थ्यांकडुन सोयी-सुविधांबाबत तक्रारी केल्या जातात, प्रश्‍न उपस्थित केले जातात, याबाबत विद्यार्थ्यांचे प्रश्‍न मार्गी लावण्याबाबत समाज कल्याण आयुक्त, डॉ.प्रशांत नारनवरे यांनी संवाद कार्यक्रम हा अभिनव उपक्रम सुरु केला आहे. या संवाद कार्यक्रमाच्या माध्यमातुन समाजकल्याण अधिकारी शासकीय वसतिगृहात मुक्काम करतात व विद्यार्थ्यांच्या अडीअडचणी संदर्भात त्यांच्याशी संवाद साधतात. या उपक्रमाचे विद्यार्थ्यांकडुन जोरदार स्वागत करण्यात आले असुन विभागाचे अधिकारी रात्रभर वसतिगृहात मुक्काम करतात. त्यांच्यासमवेत भोजन करतात. या संवाद उपक्रमामुळे शासकीय वसतिगृहांना देखील सुखद धक्का बसला आहे. यावेळी वंदना कोचुरे यांनी विद्यार्थीनींसमवेत भोजन घेतले व वसतिगृहात मुक्काम केला.

यावेळी कोचुरे यांनी वसतिगृहातील मुलींना शैक्षणिक प्रगती करण्याबरोबरच आपल्यातील कलागुणांना वाव देण्याबाबत सुचना दिल्या. प्रत्येक मुलींने वसतिगृहात होणा-या प्रत्येक उपक्रमात सहभागी झाले पाहिजे. अभ्यासाबरोबर या स्पर्धा परिक्षेचा अभ्यासही केला पाहिजे. यासाठी वसतिगृहात संगणक, वायफाय यंत्रणा इत्यादी सुविधा उपलब्ध करुन देण्याबाबतच्या सुचना श्रीमती. वंदना कोचुरे यांनी दिल्या. वसतिगृहातील प्रत्येक मुलींना शासकीय नियमानुसार भोजन, नाश्ष्टा, फळे तसेच शैक्षणिक सुविधा इ. देणेबाबतच्या सुचना गृहपाल यांना देण्यात आल्या.