धाराशिव, सांगली विजेतेपदासाठी लढणार

। धाराशिव । प्रतिनिधी ।

महाराष्ट्र खो-खो असोसिएशन व उस्मानाबाद जिल्हा खो-खो असोसिएशन यांच्या संयुक्त विद्यमाने जिल्हा सुवर्ण महोत्सवी कुमार व कुमारी राज्य अजिंक्यपद व निवड चाचणी खो-खो स्पर्धा धाराशिव येथील शिक्षण व प्रशिक्षण संस्थेच्या मैदानावर सुरू आहेत. या स्पर्धेतील अंतिम लढत कुमार व कुमारी या दोन्ही गटातून यजमान धाराशिव आणि सांगली यांच्यातच होणार आहे.

या स्पर्धेत मुलींच्या उपांत्य सामन्यात सांगलीने सोलापूरला 10-7 असे तीन गुणांनी नमविले आहे. मध्यंतराची 5-3 ही आघाडीच त्यांना विजय मिळवून दिली. प्रतीक्षा बिराजदार हिने आपल्या धारदार आक्रमणात पाच गडी बाद करीत 4 मिनिटे पळतीचा खेळ केला. सानिका चाफे हिने 4 मिनिटे संरक्षण करीत तिला साथ दिली. सोलापूरच्या स्नेहा लामकाने व प्राजक्ता बनसोडे यांची खेळी अपुरी पडली. दुसर्‍या सामन्यात धाराशिवने ठाण्यावर 11-7 असा डावाने विजय मिळविला. त्यांच्या विजयाचे शिल्पकार अष्टपैलू कामगिरी करणारे अश्‍विनी शिंदे व प्रणाली काळे हे ठरले. मात्र, ठाण्याच्या दीक्षा काटेकर हिचे प्रयत्न अपुरे पडले.

मुलांच्या उपांत्य सामन्यातही सोलापूरला सांगलीकडून 15-19 अशी हार पत्करावी लागली आहे. मध्यंतराची 7-10 ही पिछाडीच सोलापूरला महागत पडली. सांगलीच्या पार्थ देवकतेने आपल्या धारदार आक्रमणात सहा गडी बाद करीत 1ः10 मिनिटे पळती केली. अथर्व पाटील यानेही अष्टपैलू कामगिरी केली. परंतु, सोलापूरकडून शुभम चव्हाण व अमरान शेख यांची लढत अपुरी ठरली. दुसर्‍या उपांत्य सामन्यात भरतसिंग वसावेच्या अष्टपैलू खेळामुळे धाराशिवने पुण्यावर 13-12 असा 1 गुण व 4ः50 मिनिटे राखून विजय मिळविला. हरद्या वसावे याने त्याला साथ दिली. परुतु, पुण्याच्या चेतन गुंडगल याची अष्टपैलू खेळी अपुरी पडली.