चालकाने क्लचऐवजी अ‍ॅक्सिलेटर दाबला?

कुर्ला दुर्घटनेतील सर्वांत मोठी अपडेट समोर

। मुंबई । प्रतिनिधी ।

कुर्ला येथे सोमवारी रात्री झालेल्या बेस्ट बस अपघाताचा तपास पोलिसांनी सुरू केला असून, चालकाने अलिकडेच इलेक्ट्रिक बस चालविण्यास सुरुवात केल्याचं समोर आलं आहे. अवजड वाहने चालविण्याचा अनुभव त्याच्याकडे असताना केवळ 10 दिवसांचे प्रशिक्षण देऊन गर्दीच्या वेळी इलेक्ट्रिक बस चालविण्यास दिल्याबाबत कुर्ला पोलीस बेस्ट प्रशासनाकडून माहिती मागविण्यात येणार आहे. धक्कादायक म्हणजे, संबंधित चालकाने क्लचऐवजी अ‍ॅक्सिलेटर दाबल्याने अपघात घडल्याची माहिती हाती आली आहे.

आरोपी मोरे याला क्लच आणि गिअरची अवजड वाहने चालिवण्याचा अनुभव होता. अपघात झाला त्यावेळी त्याने क्लच समजून चुकून अ‍ॅक्सिलेटरवर पाय दिल्यामुळे बस थांबण्याऐवजी तिचा वेग वाढल्याची माहिती हाती आली आहे. आसपास भरपूर वर्दळ असल्यामुळे गाडी रस्त्यावर ठेवण्याच्या प्रयत्नात त्याने अनेक वाहने आणि पादचार्‍यांना उडविले आणि बसचा वेग कमी करण्यासाठी भिंतीला धडक दिली, अशी माहिती तपासात समजली असून, त्या दिशेने तपास करण्यात येत असल्याचे एका पोलीस अधिकार्‍याने सांगितले.

परिवहन विभागाकडून बसची तपासणी
अपघातात 21 मोटारगाड्या आणि एका हातगाडीचे नुकसान झाले आहे. न्यायवैधक तज्ज्ञांनी संबंधित मोटर गाड्यांवर लागलेल्या बसच्या रंगाचे नमुने गोळा केले असून, ते परिक्षणासाठी पाठवण्यात आले आहेत. बसमध्ये तांत्रिक बिघाड होता का, हे तपासण्यासाठी पोलीस परिवहन विभागाची मदत घेणार आहेत. परिवहन विभागाच्या अहवालानुसार पुढील तपास करण्यात येणार आहे. तसंच, अपघातग्रस्त वाहनाच्या देखभालीची जबाबदारी असलेल्या व्यक्तीचाही जबाब नोंदवण्यात येणार आहे. चालक मोरेविरोधात भारतीय न्याय संहिता कलम 105, 110, 118(1), 118(2), 324(5) अंतर्गत गुन्हा दाखल करण्यात आला. त्यानंतर त्याला याप्रकरणी अटक करण्यात आली. पोलीस उपनिरीक्षक प्रशांत चव्हाण यांच्या तक्रारीवरून याप्रकरणी गुन्हा दाखल करण्यात आला. त्यानंतर मोरेला मंगळवारी कुर्ला न्यायालयात हजर करण्यात आले. न्यायालायाने त्याला 21 डिसेंबरपर्यंत पोलीस कोठडी सुनावली.