जिल्हास्तरीय कुमार गट कबड्डी स्पर्धा

विशाल लाड ठरला सर्वोत्तम खेळाडू; शिवमुद्रा प्रतिष्ठानने जेतेपद पटकावले

। मुंबई । क्रीडा प्रतिनिधी ।

जुनी प्रभादेवी सार्वजनिक गणेशोत्सव मंडळ आयोजित शिवसेना (उद्धव ठाकरे) शाखा पुरस्कृत मुंबई शहर कबड्डी असो.च्या मान्यतेने स्व.वसंतशेठ नागवेकर चषक कुमार गट कबड्डी स्पर्धेचे आयोजन करण्यात आले होते. या स्पर्धा येथील येथील स्व. शीला खाटपे मॅटच्या क्रीडांगणावर खेळविण्यात आले. या स्पर्धेतील अंतिम सामन्यात लोअर परेलच्या शिवमुद्रा प्रतिष्ठानने विजेतेपद पटकावले आहे.

अंतिम सामन्यात पहिली 5 मिनिटे वगळता सामना एकतर्फीच झाला. आक्रमतेवर भर देत शिवमुद्राच्या विशाल लाडने 12व्या मिनिटाला शिलकी दोन गडी टिपत आकांक्षावर पहिला लोण देत 15-04 अशी आघाडी घेतली. याच सत्रात 17व्या मिनिटाला दुसरा लोण देत 25-09 अशी आपली आघाडी भक्कम केली. मध्यांतरानंतर तिसरा लोण देत 35-11 अशी आघाडी घेतली आणि आकांक्षाच्या गोटातील हवाच काढून घेतली. शिवमुद्राच्या विशाल लाडाच्या तुफानी चढाया रोखण्यात आकांक्षाला अपयश आले. त्यातच आकांक्षाचा हुकमी खेळाडू स्वप्नील पवार गुण मिळविण्यात अयशस्वी ठरला. त्यांचा बचाव ही या सामन्यात दुबळा ठरला. विशाल लाडच्या झंझावाती चढाया त्याला राकेश दाणीची पकडीची मिळालेली भक्कम साथ यामुळे शिवमुद्राने हा मोठा विजय मिळविला आहे. विजेत्या शिवमुद्रा संघाला रोख रक्कम 11 हजार रुपये आणि चषक देऊन गौरविण्यात आले. तर, उपविजेता ठरलेल्या आकांक्षा मंडळाला रोख रक्कम 7 हजार रुपये आणि चषक देऊन गौरविण्यात आले. त्याचबरोबर शिवमुद्राचा विशाल लाड स्पर्धेतील सर्वोत्तम खेळाडू ठरला आहे. त्याला देखील गौरविण्यात आले.
या अगोदर झालेल्या उपांत्य सामन्यात शिवमुद्राने अमर मंडळाला 45-29 असे पराभूत करीत अंतिम फेरी गाठली होती. परंतु, आकांक्षाला मात्र अंतिम फेरी गाठण्यासाठी झगडावे लागले. आकांक्षाने पूर्वार्धातील 06-20 अशा 14 गुणांच्या पिछाडीवरून पूर्ण डावात 29-29 अशी, 5-5 चढायांच्या डावात 34-34 अशी बरोबरी केली. सुवर्ण चढाईत स्वप्नील पवारने चढाईत 2 गडी टिपत संघाला अंतिम फेरी गाठून दिली. हा खेळ पाहून अंतिम लढत रंगदार होईल, असा क्रीडा रसिकांचा होरा होता. परंतु, त्यांची निराशा झाली. स्पर्धेतील दोन्ही उपांत्य उपविजयी संघाना प्रत्येकी रोख रक्कम 5 हजार रुपये व आकर्षक चषक प्रदान करण्यात आले.

अंतिम दिवशी आ. सुनील शिंदे, लालबागच्या राजाचे सचिव सुधीर साळवी यांनी भेट दिली. पद्मश्री डॉ. तात्याराव लहाने, डॉ. सुमित लहाने, संकेत नागवेकर, ए.सी.पी. राजू तेजाळे, श्रीराम साळगावकर, निशिकांत शिंदे, निरंजन नलावडे, संघटनेचे अध्यक्ष व स्पर्धा आयोजक संजय भगत, कार्याध्यक्ष राजेंद्र परब, सचिव सुरेश चित्रे, स्पर्धा प्रमुख समीर बिडू आदी मान्यवरांच्या उपस्थितीत स्पर्धेचे बक्षीस वितरण पार पडले.