पालीमध्ये जिल्हास्तरीय कबड्डी स्पर्धा उत्साहात

| पाली | वार्ताहर |

रायगड जिल्हा क्रीडा परिषद अलिबाग यांच्या वतीने 2023-24 या शैक्षणिक वर्षातील जिल्हास्तरीय कबड्डी स्पर्धेचे आयोजन पालीतील ग.बा. वडेर हायस्कूल व व.ग. ओसवाल ज्युनिअर कॉलेज येथे दि.12 व 13 रोजी करण्यात आले होते. या स्पर्धेत पालीतील ग.बा. वडेर हायस्कूल व व.ग. ओसवाल ज्युनिअर कॉलेजच्या 17 वर्ष मुले संघाने सलग दुसऱ्यांदा प्रथम क्रमांक मिळवला आहे.

प्रशिक्षक राकेश बेलोसे व हरिदास घोळवे यांच्या मार्गदर्शनाखाली सलग दुसऱ्यांदा अलिबाग या संघाचा पराभव करून अंतिम विजयी संघ ठरला आहे. हा संघ पालघर येथे होणाऱ्या मुंबई विभागीय स्पर्धेसाठी पात्र ठरला आहे. या यशाबद्दल सुएसोच्या संचालिका गीता पालरेचा, उपाध्यक्ष रवींद्र लिमये साहेब, सचिव रविकांत घोसाळकर व प्राचार्य भाऊसाहेब घोडके यांनी संघ व प्रशिक्षक यांचे अभिनंदन केले या स्पर्धेत जिल्ह्यातील मुली व मुलाच्या 90 कबड्डी संघाने सहभाग घेतला होता. मुलींच्या 14 वर्षीय वयोगटात प्रथम क्रमांक कर्जत, द्वितीय क्रमांक सुधागड, 17 वर्षे वयोगटात प्रथम क्रमांक माणगाव, द्वितीय क्रमांक अलिबाग, 19 वर्षे वयोगटात प्रथम क्रमांक अलिबाग, द्वितीय क्रमांक सुधागड तर मुलांच्या कबड्डी स्पर्धेत 14 वर्षे वयोगटात प्रथम महाड, द्वितीय खालापूर, 17 वर्षे वयोगटात प्रथम सुधागड, द्वितीय अलिबाग, 19 वर्षे वयोगटात प्रथम अलिबाग, द्वितीय मुरुड या संघाने पारितोषिके पटकावली.