जिल्हास्तरीय क्रीडा यशस्वीरित्या संपन्न

। अलिबाग । वार्ताहर ।

नेहरू युवा केंद्र अलिबाग यांच्या माध्यमातून केंद्राचे युवा अधिकारी निशांत रौतेला यांच्या प्रमुख मार्गदर्शनाखाली नुकत्याच जिल्हास्तरीय क्रीडा स्पर्धांचे आयोजन करण्यात आले होते. या स्पर्धेत 100 मीटर धावणे, गोळा फेक इत्यादी स्पर्धा नेहुली येथील जिल्हा क्रीडा संकुलात संपन्न झाल्या. तसेच, मुलांसाठी कबड्डी स्पर्धा व मुलींसाठी खो-खो स्पर्धा या वेश्‍वी येथील पीएनपी माध्यमिक शाळेच्या क्रीडांगणवर संपन्न झाल्या.

यावेळी मान्यवर म्हणून अ‍ॅड. कला पाटील, प्राजक्ता कोकणे, पी.एन.पी. कनिष्ठ विद्यालयाचे उपप्राचार्य निशिकांत कोळसे, आंतरराष्ट्रीय खेळाडू तपस्वी गोंधळी, स्वयंसिद्धा संस्थेच्या अध्यक्षा सुचिता साळवी, नेहरू युवा केंद्राचे प्रतिनिधी जयेश म्हात्रे, यतीराज पाटील, पी.एन.पी. कनिष्ठ विद्यालयाचे तेजस म्हात्रे, दिव्या मोकल, रायगड पोलीस शिवानी चव्हाण, ऋतुजा सकपाल, जिल्हा क्रीडा अधिकारी कार्यालयाचे कर्मचारी व स्पर्धेत सहभागी झालेले बहुसंख्य खेळाडू उपस्थित होते.
पुरुष खुलागट कबड्डी स्पर्धेत पी.एन.पी. कनिष्ठ विद्यालयाने प्रथम क्रमांक पटकावला. तर, स्पर्धा विश्‍व अकॅडमी अलिबागने द्वितीय क्रमांक व प्रिझम संघाने तृतीय क्रमांक पटकावला आहे. महिला खुलागट खो-खो स्पर्धेत अजिंक्य क्रीडा संस्था अलिबागने प्रथम क्रमांक पटकावला. तर, स्पर्धा विश्‍व अकॅडमीने द्वितीय क्रमांक, व प्रिझम संस्थेने तृतीय क्रमांक पटकावला आहे. त्याचबरोबर 100 मीटर धावणे पुरुष खुलागटात गौरव महेंद्र पाटील प्रथम, अक्षय देसाई द्वितीय तर शिवकुमार निलंगे तृतीय क्रमांक पटकावला आहे. महिला खुलागटात रिया गुंजाळ प्रथम, नेहा मानकर द्वितीय तर साक्षी पाटीलने तृतीय क्रमांक पटाकवला आहे. गोळाफेक स्पर्धेत मुलींमध्ये हर्षाली गावंड प्रथम, ओवी पाटील द्वितीय तर जीविका म्हात्रेने तृतीय क्रमांक पटाकवला आहे. मुलांमध्ये श्‍लोक नाईक प्रथम, केतन राणे द्वितीय तर श्रेयस पाटीलने तृतीय क्रमांक मिळविला आहे. सर्व विजेत्या खेळाडूंना प्रमाणपत्र मेडल देऊन सन्मानित करण्यात आले.