खोपोली नगरपरिषदेचा स्तुत्य उपक्रम

श्‍वानांच्या निर्बिजीकरण मोहिमेला सुरुवात

। खोपोली । प्रतिनिधी ।

खोपोली शहरात भटक्या श्‍वानांची वाढती संख्या आणि श्‍वानदंशाच्या घटना नियंत्रित करण्याकरीता नगर परिषदेच्यावतीने श्‍वानांचे निर्बिजीकरण आणि अँटी रेबीज व्हॅक्सिनेशन मोहिमेला सोमवारी (दि.23) सुरवात करण्यात आली आहे. या मोहिमेचा संकल्प मुख्याधिकारी डॉ. पंकज पाटील यांनी केला असून त्यासाठी महाराष्ट्र शासनाच्या तरतुदीनुसार पेट्स फोर्स या संस्थेची नियुक्ती करण्यात आली आहे.

या मोहिमेत खोपोली नगरपरिषदेचे मुख्याधिकारी डॉ. पंकज पाटील यांच्यासह माजी नगरसेवक किशोर पानसरे, सामाजिक कार्यकर्ते विजय तेंडुलकर, जैन संघटनेचे किशोर ओसवाल, गोरक्षक तथा प्राणीमित्र हनीफ कर्जीकर, अमोल ठकेकर, अपघातग्रस्तांच्या मदतीसाठी सामाजिक संस्थेचे सदस्य, नगरपरिषदेचे अधिकारी आणि कर्मचारी तसेच जागरूक नागरिक सहभागी झाले होते.

श्‍वानांचे निर्बिजीकरण या मोहिमेत खोपोली शहरातील भटक्या श्‍वानांना टप्प्याटप्प्याने विभागवार सुरक्षित पकडण्यात येणार असून त्यांना रेस्न्यू व्हॅनमधून निर्बिजीकरण केंद्रात नेण्यात येणार आहे. निर्बिजीकरणासोबत अँटी रेबीज व्हॅक्सिनेशनही केले जाणार असून शस्त्रक्रियेनंतर श्‍वानाची प्रकृती स्थिरस्तावर झाल्यानंतर ज्या विभागातून त्यांना ताब्यात घेतले आहे तेथेच पुन:श्‍च सोडण्यात येणार असल्याची माहिती पेट्स फोर्स संस्थेचे विनोद साळवी यांनी दिली आहे. सोमवारी डॉ. बाबासाहेब आंबेडकर रुग्णालय परिसर आणि समाज मंदिर रोडवरील श्‍वानांना ताब्यात घेण्यात आले आहे. तसेच, दररोज ही मोहीम राबवण्यात येणार असून या मोहिमेचे सर्व स्तरावरून स्वागत होत आहे.