मालाडमध्ये घरगुती सिलेंडरचा स्फोट; सात जण जखमी

। मुंबई । प्रतिनिधी ।

मालाडमधील मालवणी परिसरात मंगळवारी घरगुती सिलेंडरचा स्फोट झाला. या स्फोटात सात जण भाजले आहेत. जखमींपैकी 4 जणांना आधार रुग्णालयात आणि 3 जणांना क्रिटी केअर रुग्णालयात दाखल करण्यात आले आहे. मालवणी गेट क्रमांक 8, ए.सी. मशिदीजवळ, भारत माता शाळेच्या बाजूला असलेल्या चाळीत ही घटना घडली.

मिळालेल्या माहितीनुसार, सकाळी साडे नऊ वाजण्याच्या सुमारास ही घटना घडली. घटनेची माहिती मिळताच तात्काळ मुंबई अग्निशमन दल, पोलीस, अदानी इलेक्ट्रिसिटी, 108 रुग्णवाहिका आणि बीएमसी वॉर्ड कर्मचारी घटनास्थळी दाखल झाले. अग्निशमन दलाने तात्काळ आग विझवण्यास सुरूवात केली. गॅस सिलेंडरमधून गॅस गळती झाल्याने स्फोट होऊन आग लागली. जखमींना स्थानिकांनी क्रिटी केअर रुग्णालयात नेले आहे, असे एका वरिष्ठ आपत्कालीन व्यवस्थापन अधिकाऱ्याने सांगितले.

आधार हॉस्पिटलमध्ये खालील जखमींवर उपचार सुरू आहेत. डॉ. शाईमा शेख यांच्या देखरेखीखाली उपचार केले जात आहेत. रुमा चौधरी (43), अलिषा चौधरी (20), जुलेखा बानू (47), आदिल शेख (2) या सर्वांना भाजल्यामुळे जखमा झाल्या असून प्रकृती स्थिर असल्याचे डॉक्टरांनी सांगितले आहे.

केअर खासगी रुग्णालयात दाखल करण्यात आलेल्या काही जखमींची अवस्था अधिक गंभीर आहे. डॉ. सभाउद्दीन यांच्या देखरेखीखाली जखमींवर उपचार सुरू आहेत. विजय अशोक चौधरी (48), तोसिफ खान (22), अली कासिम (18) जखमींना अतिदक्षता विभागात ठेवण्यात आले असून त्यांची प्रकृती बारकाईने तपासली जात आहे.

घटनेची माहिती मिळताच अग्निशमन दलाचे पथक आणि पोलिसांनी घटनास्थळी धाव घेतली. आग नियंत्रणात आणण्यात आली असून परिसर सुरक्षित करण्यात आला आहे. गॅस गळतीमुळे स्फोट झाला की सिलिंडरमध्ये तांत्रिक बिघाड होता, याचा तपास पोलिसांकडून सुरू आहे. या घटनेमुळे पुन्हा एकदा घरगुती गॅस सिलिंडरच्या सुरक्षिततेचा प्रश्न ऐरणीवर आला आहे. नागरिकांनी गॅस वापरताना आवश्यक ती खबरदारी घ्यावी, असे आवाहन प्रशासनाकडून करण्यात आले आहे.