तळोजा परिसरातून कोट्यवधींचे अमली पदार्थ जप्त

। नवी मुंबई । प्रतिनिधी ।

नवी मुंबईला नशामुक्त करण्याच्या उद्देशाने पोलीस आयुक्त मिलिंद भारंबे यांनी दिलेल्या सूचनांनुसार अमली पदार्थ विरोधी पथकाने तळोजा परिसरातील एका फ्लॅटवर छापा टाकून अमली पदार्थाच्या रॅकेटचा पर्दाफाश केला आहे. या कारवाईत पोलिसांनी नवज्योतसिंग उर्फ विकी रंधावा (34) आणि गुरज्योतसिंग उर्फ सनी रंधावा (32) या दोन भावांना अटक केली. त्यांच्याजवळ सापडलेले तब्बल 1 कोटी 17 लाख 19 हजार रुपये किंमतीचे हेरॉईन आणि अफीम जप्त केले आहे. तसेच, पोलिसांनी या रॅकेटमध्ये सहभागी असलेले पुरवठादार व सब डीलर अशा पाच जणांचा शोध सुरु केला आहे.

तळोजा परिसरामध्ये अमली पदार्थाचे मोठे रॅकेट सुरु असल्याचे तसेच दोन व्यक्ती अमली पदार्थांचा पुरवठा करत असल्याची माहिती अमली पदार्थ विरोधी पथकाला मिळाली होती. त्यानुसार पोलीस उप आयुक्त (गुन्हे शाखा) सचिन गुर्जाळ यांच्या मार्गदर्शनाखाली बरिष्ठ पोलीस निरीक्षक संदीप निगडे आणि त्यांच्या पथकाने हेरिटेज कंसल या बिल्डिंगमधील नवज्योतसिंग आणि गुरज्योतसिग हे दोघे भाऊ राहत असलेल्या फ्लॅटवर छापा टाकला. या छाप्यात 158 ग्रॅम हेरॉईन (किंमत 1 कोटी 16 लाख 19 हजार) आणि 40 ग्रॅम अफीम (किंमत 1 लाख) असा साठा आढळून आला. त्यामुळे अमली पदार्थ विरोधी पथकाने 1 कोटी 17 लाख रुपये किंमतीचा अमली चौकशीत नवज्योतसिंग आणि गुरज्योतसिंग हे दोघेही पंजाब येथून ट्रक ड्रायव्हर मार्फत अमली पदार्थ नवी मुंबईत मागवून ते तळोजा व कळंबोलीतील चार सब डीलर मार्फत ग्राहकांना विक्री करत असल्याचे निष्पन्न झाले. त्यानुसार अमली पदार्थ विरोधी पथकाने या दोघांवर गुन्हे दाखल करुन अटक केली आहे.

दरम्यान, पंजा पंजाब येथून नवी मुंबईत अमली पदार्थ आणून देणारा मुख्य पुरवठादार तसेच नवज्योतसिंग आणि गुरज्योतसिंग या दोघांमार्फत ग्राहकांना अमली पदार्थाची विक्री करणारे चार सब डिलर या पाच जणांचा या रॅकेटमध्ये सहभाग असल्याचे निष्पन्न झाले असून पोलिस त्यांचा शोध घेत आहेत.

ही कारवाई सहपोलीस आयुक्त संजयकुमार बेनपुरे, अप्पर पोलीस आयुक्त (गुन्हे) दीपक साकोरे, पोलीस उप आयुक्त (गुन्हे शाखा) सचिन गुजांळ, आणि सहाय्यक पोलीस आयुक्त प्रेरणा कडू यांच्या मार्गदर्शनाखाली वरिष्ठ पोलीस निरीक्षक संदीप निगडे, पोलीस हवालदार रमेश तायडे, पदु दोरे, गणेश पवार, चालक परमेश्वर भाबड, पोलीस शिपाई पाटील आणि महिला पोलीस कॉन्स्टेबल पगारे यांच्या पथकाने केली.