म्हसळा येथे डंपरचा अपघात, चालक जागीच ठार

| म्हसळा | वार्ताहर |

ओव्हरलोड मायनिंग वाहतूक करणारा आयवा डंपर श्रीवर्धन कडून म्हसळा मार्गे सकलप गावाचे हद्दीतील दिघी पुणे राष्ट्रीय मार्गाचे सकलप फाटा येथे आज सोमवार (दि.24) रोजी दुपारी 4.30 वाजताच्या सुमारास तीव्र उतार उतरत असताना चालकाचा गाडीवरील ताबा सुटल्याने डंपर समोरील डोंगराला धडकुन अपघात झाला. या अपघातात डंपरचा पुढील भाग पुर्णपणे चेपला गेल्याने डंपर चालक नसिमुद्दिन जमरुद्दिन अनसारी (35) रा.नवदानगर, बिलूनगड, हजारीबाग झारखंड हा गाडीतच अडकुन जागीच मृत्यू झाला. मायनींग वाहतूक करणारा आयवा डंपर हा श्रीवर्धन येथील रमेश मोहिते यांचे मालकीचा असल्याचे सांगण्यात आले. अपघाताची माहिती मिळताच म्हसळा पोलिस ठाण्याचे उपपोलिस निरीक्षक ज्ञानेश्वर एडवळे, उप पोलिस निरीक्षक रोहिनकर, पोलिस कॉन्स्टेबल पालोदे आदी पोलिस कर्मचारी आणि शेकडो स्वयंसेवी नागरीक यांनी घटनास्थळी जावून मदतकार्य केले. अपघाताची तीव्रता पहाता अपघात झालेल्या गाडीत अडकुन पडलेल्या डंपर चालकाचा मृतदेह बाहेर काढण्यासाठी दोन जेसीबीचे साहाय्याने तब्बल एक तास प्रयत्न करावे लागले. या कामी पोलिसांना म्हसळा स्वयंसेवी नागरिकांनी खुप मेहनत व मदत केली.