चिपसह सुसज्ज ई पासपोर्ट

। नवी दिल्ली । वृत्तसंस्था ।
पासपोर्ट हे एक महत्त्वाचे दस्तऐवज बनले आहे. त्यामुळेच सरकारने 2022 च्या अर्थसंकल्पात पासपोर्टबाबत मोठी घोषणा केली आहे. आंतरराष्ट्रीय प्रवास सुलभ करण्यासाठी 2022-23 मध्ये ई-पासपोर्ट जारी केले जातील. 2022-23 मध्ये ई-पासपोर्ट जारी करणे सुरू केले जाईल. यामुळे सरकार आणि प्रवासी दोघांसाठी ही प्रक्रिया सुलभ आणि अधिक पारदर्शक होईल. हा ई-पासपोर्ट सामान्य पासपोर्टसारखा दिसतो. ई-पासपोर्टमध्ये एक छोटी इलेक्ट्रॉनिक चिप असते, जी ड्रायव्हिंग लायसन्ससारखी असते. नाव, जन्मतारीख, पत्ता आणि इतर तपशीलांसह तुमच्या पासपोर्टवर छापलेली सर्व माहिती मायक्रोचिपमध्ये साठवली जाते. मायक्रोचिप इमिग्रेशन काउंटरना प्रवाशांच्या कोणत्याही तपशीलाची त्वरित पडताळणी करण्यास मदत करेल. या निर्णयामुळे बनावट पासपोर्टचे प्रमाण कमी होण्यासही मदत होणार आहे. ई-पासपोर्टसह, इमिग्रेशन काउंटरवर घालविण्यात येणार वेळ 50 टक्क्यांनी कमी होण्याची अपेक्षा आहे.
नवीन पासपोर्टसाठी अर्ज करण्याची प्रक्रिया तशीच राहील आणि अर्जामध्ये कोणताही बदल होणार नाही. अहवालानुसार, परराष्ट्र मंत्रालयाच्या अंतर्गत भारतातील सर्व 36 पासपोर्ट कार्यालये ई-पासपोर्ट जारी करतील. जारी करण्याची प्रक्रियाही तशीच राहील. आतापर्यंतच्या ट्रायल रनमध्ये, सरकारने जारी केलेले ई-पासपोर्ट वैयक्तिक छापील पुस्तिकेच्या स्वरूपात आले होते.