बेणसेत हिंदू-मुस्लिम ऐक्याचे दर्शन

उत्साही वातावरणात ईद सण साजरा

| पाली/बेणसे | प्रतिनिधी |

संपूर्ण देश व राज्यभरात मुस्लिम बांधवांनी रमजान ईदचा पवित्र सण अत्यंत उत्साही वातावरणात साजरा केला. रायगड जिल्ह्यातील बेणसे येथील जामा मस्जिदमध्ये शनिवारी (दि.21) सकाळी मुस्लिम बांधवांनी नमाज पठण करून ईद सण उत्साहात साजरा केला. यावेळी मुस्लिम बांधवांची नमाज अदा करण्यासाठी गर्दी झाली होती. यावेळी बेणसेत रमजान ईदनिमित्त हिंदू मुस्लिम ऐक्याचे अनोखे दर्शन घडले. येथील मस्जिदमध्ये हिंदू, मुस्लिम, बौद्ध, व सर्व धर्मीय बांधवांनी एकत्रित येत शांतता पूर्ण व एकोपा जोपासत ईदचा आनंद द्विगुणित केला. मुस्लिम बांधवांमध्येदेखील प्रचंड उत्साह पहावयास मिळाला. यावेळी पांढरे शुभ्र कपडे परिधान करून एकमेकांना शुभेच्छा देताना आपलेपण व जिव्हाळ्याचे वातावरण निर्माण झाले होते. यावेळी गळाभेट घेत एकमेकांना ईदच्या शुभेच्छा देण्यात आल्या. मुस्लिम बांधवांनी अत्यंत उत्साही वातावरणात ईद सण साजरा केला. उपस्थित मान्यवर व नागरिकांना मुस्लिम बांधवांनी गुलाब पुष्प व गोड पदार्थ देत रमजान ईद च्या शुभेच्छा दिल्या.

पवित्र रमजान सुरू असताना मुस्लिम समाजातील लहान मुले, तरुण व मुस्लिम बांधवांनी रोजे धरले होते. ईदनिमित्त त्यांनी पांढरे शुभ्र वस्त्र परिधान करून प्रसन्न मनाने नमाज पठण केले. बेणसे झोतीर पाडा विभागात गेले कित्येक वर्षांपासून हिंदू मुस्लिम बौद्ध बांधव अतिशय गुण्या गोविंदयाने नांदतात. एकमेकांच्या सण व उत्साहात आनंदाने सहभागी होतात. येथील सर्वधर्मीय एकोपा व सामाजिक सलोखा संपूर्ण जिल्ह्याला आदर्शवत ठरावा असाच आहे. त्यामुळे बेणसे येथील ईदच्या सणाला सारेच जण आवर्जून उपस्थित राहतात. मुस्लिम बांधवांकडून यावेळी मिळणारे प्रेम व जिव्हाळा सर्वांना गहिवरून टाकणारा होता. खऱ्या अर्थाने रायगड जिल्ह्यात सर्वत्रच रमजान ईदचा सण उत्साही वातावरणात व धुमधडाक्यात साजरा झाल्याचे पहावयास मिळते.

यावेळी कोणताही अनुचित प्रकार घडू नये यासाठी नागोठणे पोलीस निरीक्षक सचिन कुलकर्णे यांच्या मार्गदर्शनाखाली पोलीस बंदोबस्त देखील ठेवण्यात आला होता. यावेळी अध्यक्ष अजीम बेनसेकर यांनी मुस्लिम समाज बांधवांच्या वतीने उपस्थित मान्यवरांचे आभार मानले.