साडेअठरा लाखांची वीजचोरी उघडकीस; २३ जणांविरोधात कारवाई

। कल्याण । प्रतिनिधी ।
महावितरणच्या टिटवाळा उपविभागातील बल्याणी आणि कोन परिसरात वीजचोरी करणार्‍या तेवीस जणांवर धडक कारवाई करण्यात आली. या कारवाईत 18 लाख 50 हजार रुपये किंमतीच्या वीजचोरीचा पर्दाफाश करण्यात महावितरणच्या पथकाला यश आले. वीज कायदा 2003 च्या कलम 135 नुसार बल्याणी येथील 17 जणांविरुद्ध मुरबाड पोलिस ठाण्यात तर कोन येथील 6 जणांविरुद्ध भिवंडीतील शांतीनगर पोलिस ठाण्यात वीजचोरीचा गुन्हा दाखल करण्यात आला आहे.

अरमान अली सलीम इदरसी, समीर खान, जयनुल अबदीन जहीर खान, जुनेद ईकबाल रईस, अलम इब्राहीम रईस, ताहीर खान नामीन, शिवाजी गायकर, युसूफ शेख, सोहेल जनेउद्दिन पाकुरडे, अन्सारी शकील अब्दुल गणी, मीना राजेश गुप्ता, शराफत ईकबाल रईस, गयुसिया वाहीद रईस, साधना अनिलकुमार पांडे, सोहेल बालमिंया रईस, असलम गुलामअली गुजर, अलमास हसरत सरगावकर (सर्व रा.बल्याणी) यांच्याविरुद्ध 15 लाख रुपयांच्या वीज चोरीप्रकरणी मुरबाड पोलिस ठाण्यात तर सतीश रामदास जोशी, मारुती सर्म्या मढवी, यशवंत बाबू नागवेकर, राजेश नानू मुकादम, अक्षय सुभाष पाटील, आतिष गुरुनाथ पाटील (सर्व रा.कोन) यांच्याविरुद्ध साडेतीन लाखांच्या वीज चोरीप्रकरणी भिवंडीतील शांतीनगर पोलिस ठाण्यात गुन्हा दाखल झाला आहे. या सर्वच आरोपींनी वीज मीटरला येणार्‍या केबलला टॅपिंग करून वीज मीटर टाळून परस्पर वीजवापर केल्याचे आढळून आले.

उपविभागीय अभियंता गणेश पवार यांच्या मार्गदर्शनाखाली सहायक अभियंते निलेश महाजन, अभिषेक कुमार व त्यांच्या टिमने ही कारवाई केली. वीजचोरीच्या गुन्ह्यात जबर शिक्षा व दंडाची तरतूद असून कोणत्याही प्रकारे विजेचा अनधिकृत वापर करू नये, असे आवाहन महावितरणकडून करण्यात येत आहे.