स्वराज्य ग्रामीण बिगरशेती पतसंस्थेत करोडो रुपयांची अफरातफर

चेअरमन, सचिव यांना अटक

| नागोठणे | वार्ताहर |

ज्या विश्वासाने ठेवीदारांनी आपल्या कष्टाची कमाई ठेवण्यास दिली त्याच विश्वासाला मोठा तडा लावण्याचा पराक्रम करणाऱ्या नागोठण्याजवळील शेतजुई येथील स्वराज्य ग्रामीण बिगरशेती सहकारी पतसंस्थेचे चेअरमन प्रणयकुमार हिंदुराव सावंत व सचिव संजीवन विनायक पाटील या दोघांनी केला आहे. पतसंस्थेतील सुमारे 3 कोटी, 83 लाख, 51,261 एवढ्या मोठ्या रकमेची अफरातफर केल्याप्रकरणी दोघांनाही नागोठणे पोलिसांनी अटक केली आहे. रकमेचा अपहार केल्याचा हा गुन्हा 28 मार्च, 2012 ते 8 डिसेंबर, 2022 दरम्यान घडला.

या प्रकरणातील दोन्ही आरोपींविरोधात नागोठणे पोलीस ठाण्यात 22 ऑगस्ट रोजी संध्याकाळी साडेसात वाजता गुन्हा दाखल करण्यात आला आहे. या दोन्ही आरोपींना शनिवारी (दि.23) सकाळी अलिबाग येथील सत्र न्यायालयात हजर केले असता त्यांना 26 ऑगस्ट पर्यंत चार दिवसांची पोलीस कोठडी देण्यात आली आहे. कर्जत येथील सहकारी संस्थांचे लेखापरीक्षक श्रेणी 2 चे अधिकारी अंकुश शिंदे यांच्या फिर्यादीनुसार नागोठणे पोलिसांनी ही कारवाई केली आहे.

यासंदर्भात उपलब्ध झालेल्या माहितीनुसार, नागोठण्याजवळील शेतजुई येथे स्वराज्य ग्रामीण बिगरशेती सहकारी पतसंस्थेची स्थापना केल्यानंतर आरोपी प्रणयकुमार सावंत संस्थापक चेअरमन म्हणून तर दुसरा आरोपी संजीवन पाटील सचिव म्हणून कार्यरत होते. ही पतसंस्था रिलायन्स निवासी संकुलाच्या जवळच असल्याने आणि दोन्ही आरोपी हे त्यावेळी रिलायन्स कंपनीचे कर्मचारी असल्याने ते रिलायन्स कॉलनी मध्येच राहण्यास होते. रिलायन्स कॉलनीत राहणारे कंपनीतील आपल्या इतर सहकाऱ्यांचा विश्वास या दोघांनी संपादन केला. त्यानंतर या दोन्ही आरोपींनी सुमारे दहा वर्षाच्या काळात 576 ठेवीदारांकडून सुमारे 3 कोटी, 83 लाख, 51,261 एवढी मोठी रक्कम ठेवींच्या स्वरूपात जमा केली. मात्र या रकमेचा योग्य हिशोब या दोन्ही आरोपींनी ठेवला नाही. त्यामुळे सर्व ठेवीदारांना त्यांची ठेवींची रक्कम परत देण्यास हे दोन्ही आरोपी टाळाटाळ करू लागले. तसेच ठेवींची रक्कम परत न करण्याबरोबरच पतसंस्थेतील डे बुक, सब डे बुक व कॅश बुकमध्ये खोटा हिशोब तयार करून बनावट अभिलेख तयार केले. सर्व ठेवीदारांची फसवणूक केल्याप्रकरणी आरोपींना नागोठणे पोलिसांनी जेरबंद केले. तसेच कोर्टाने आरोपींना चार दिवसांची पोलीस कोठडी दिल्याने पोलिसांच्या तपासात अजून काही धक्कादायक गोष्टी समोर येण्याची शक्यता आहे.