शेकाप, काँग्रेस, महाविकास आघाडीच्या उमेदवारांचे जल्लोषात स्वागत
| रायगड | जिल्हा प्रतिनिधी |
अलिबाग नगरपरिषदेच्या निवडणूकीच्या पार्श्वभूमीवर शेकाप, काँग्रेस, महाविकास आघाडीच्या उमेदवारांनी प्रचाराला सुुरूवात केली आहे. नगराध्यक्षपदाच्या उमेदवार अक्षया प्रशांत नाईक यांच्यासह प्रभाग एक ते दहामधील नगरसेवक पदाच्या उमेदवारांच्या प्रचाराला मतदारांकडून उत्स्फुर्त प्रतिसाद मिळत असून, मतदारांकडून उमेदवारांचे जल्लोषात स्वागत केले जात असल्याचे दिसून येत आहे.
अलिबाग नगरपरिषदेच्या थेट नगराध्यक्षसह नगरसेवकपदाच्या 21 जागांची लढत होती. मात्र, प्रभाग दोनमधील नगरसेवकपदाचे उमेदवार प्रशांत नाईक यांच्यासमोर असलेल्या भाजपचे संतोष साळुंखे यांनी उमेदवारी अर्ज गुरुवारी मागे घेतला. त्यामुळे प्रशांत नाईक यांची बिनविरोध निवड झाली. त्यामुळे कार्यकर्त्यांनी जल्लोष साजरा केला.
अलिबाग नगरपरिषदेच्या थेट नगराध्यक्षपदासाठी अक्षया प्रशांत नाईक, नगरसेवक पदासाठी प्रभाग एकमधून संतोष मधुकर गुरव, संध्या शैलेश पालवणकर. प्रभाग दोनमधून सुषमा नित्यानंद पाटील, प्रभाग तीनमधून साक्षी गौतम पाटील, आनंद अशोक पाटील, प्रभाग चारमधून रेश्मा मनोहर थळे, महेश वसंत शिंदे. प्रभाग पाचमधून निवेदिता राजेंद्र वाघमारे, समीर मधुकर ठाकूर. प्रभाग सहामधून ऋषीकेश रमेश माळी, अश्विनी ठोसर. प्रभाग सातमधून ॲड. मानसी संतोष म्हात्रे, अभय म्हामुणकर. प्रभाग आठमधून ॲड. निलम किशोर हजारे, अनिल चोपडा. प्रभाग नऊमधून योजना प्रदिप पाटील, सागर शिवनाथ भगत. प्रभाग दहामधून शैला शेषनाथ भगत, वृषाली महेश भगत हे महाविकास आघाडीचे उमेदवार निवडणुकीच्या रिंगणात आहेत.
मंगळवारपासून प्रचाराला सुरुवात करण्यात आली. अलिबागमधील कांळबादेवीचे दर्शन घेऊन प्रचार सुरू केला. त्यानंतर चेंढरे, बाजारपेठ, या परिसरात प्रचाराचा शुभारंभ केला. मतदारांना भेटून मतदान करण्याचे आवाहन केले जात आहे. यावेळी शेकाप, काँग्रेस, महाविकास आघाडीच्या उमेदवारांना उत्स्फुर्त प्रतिसाद मिळत आहे. शेकाप, महाविकास आघाडीच्या उमेदवारांनी मतदारांसह कार्यकर्ते व महिलांशी संवाद साधून निवडून देण्याचे आवाहन केले. या प्रचारात शेकापचे कार्यकर्ते महिला, तरुण मंडळी स्वयंस्फूर्तीने सहभागी होत आहेत. एक वेगळा उत्साह या निमित्ताने दिसून येत आहे