घारापुरी बेटावरील रहस्य उलगडणार

पुरातत्त्व विभागाकडून उत्खननाला सुरुवात

| उरण | प्रतिनिधी |

प्रसिद्ध घारापुरी बेटावर पुरातन वस्तू सापडल्या आहेत. दगडी तसेच धातूच्या या वस्तू असून पुरातत्व विभागाने शेतबंदर ते सीतागुंफा या दरम्यान उत्खनन सुरू केले आहे. अंदाजे 70 मजूर खोदकाम करीत असून चार ते सहा महिने ही प्रक्रिया सुरू राहणार आहे. उत्खननानंतर आणखीही काही मौल्यवान व पुरातन दुर्मिळ वस्तू सापडतील असा अंदाज व्यक्त करण्यात येत आहे. तसेच या सर्वेक्षणातून आणि खोदकामातून ऐतिहासिक घारापुरी बेटावरील इतिहासावर आणखी प्रकाश पडण्यास मदत होईल, असा विश्वास भारतीय पुरातत्त्व सर्वेक्षण विभागाच्या अधिकाऱ्यांनी व्यक्त केला आहे.

या पुरातन बेटावर विविध ठिकाणी करण्यात आलेल्या खोदकामात दळणकांड करण्यासाठी वापरात येणारी पुरातन काळातील जाते, मडकी, भव्य शिवलिंग, विविध पुरातन वस्तूंचे भग्न अवशेष अनेकदा सापडले आहेत. काही दिवसांपूर्वी भारतीय पुरातत्त्व सर्वेक्षण विभागाच्या अधिकाऱ्यांनी शेतबंदर गावातील स्मशानभूमी ते सीता गुंफा या एक हजार मीटर लांबीच्या परिसरात केलेल्या सर्वेक्षणात विविध पुरातन वस्तू आढळून आल्या.

तसेच मोरा बंदर येथील डोंगराच्या पायथ्याशी व समुद्राला मिळणाऱ्या ओढे, नाले यांच्यामध्ये सोने, चांदी व इतर धातूंच्या मुद्रा, नाणीही आढळून येतात. त्यामुळे या दोन्ही ठिकाणी आणखी उत्खनन करण्याचा निर्णय भारतीय पुरातत्त्व सर्वेक्षण विभागाच्या अधिकाऱ्यांनी घेतला आहे. यासाठी या ठिकाणी खोदकाम करून शोध घेतला जाणार आहे. यासाठी 4 ते 6 महिने सुमारे 70 मजूर खोदकाम करणार आहेत.

काळ्या पाषाणात कोरलेल्या या लेण्या जगप्रसिद्ध आहेत. त्या पाहण्यासाठी जगभरातील पर्यटक घारापुरी येथे येतात. या निसर्गरम्य ठिकाणी येणाऱ्या पर्यटकांना या उत्खननामुळे लाभ होणार आहे. तसेच, शेतबंदर गाव, मोरा बंदर या दोन्ही ठिकाणी आणखी उत्खनन करण्याचा निर्णय भारतीय पुरातत्त्व सर्वेक्षण विभागाच्या अधिकाऱ्यांनी घेतला आहे. यासाठी या ठिकाणी खोदकाम करून शोध घेतला जाणार आहे. यासाठी 4 ते 6 महिने सुमारे 70 मजूर खोदकाम करणार आहेत.