नकली पिस्तूल उगारुन पसरवली दहशत; दोघांना अटक

। पुणे । प्रतिनिधी ।

मुंबई-बंगळुरू बाह्यवळण मार्गावरील वडगाव पूल परिसरात धक्कादायक घटना घडली. दिवाळीत फटाके फोडण्यासाठी वापरण्यात येणाऱ्या पिस्तुलीने दहशत माजवण्याचा प्रयत्न करण्यात आला. याप्रकरणी पोलिसांनी दोघांना ताब्यात घेतले असून त्यांच्याविरुद्ध सिंहगड रस्ता पोलीस ठाण्यात गुन्हा दाखल करण्यात आला आहे.

ही घटना वडगाव पूल ते वारजे पुलाच्या दरम्यान घडली आहे. शुक्रवारी (दि. 02) भर रस्त्यातून भरधाव दुचाकीवरून दिवाळीत फटाके फोडण्यासाठी वापरण्यात येणारी पिस्तूल उगारुन दहशत पसरवण्याचा दोन जणांनी प्रयत्न केला. या घटनेमुळे नागरिकांमध्ये भीतीचे वातारण निर्माण झाले. याबाबतचा व्हिडिओ व्हायरल झाल्यानंतर सिंहगड रस्ता पोलिसांनी दहशत माजविणाऱ्या तरुणांचा शोध घेतला. याप्रकरणी अक्षय अंकुश गायकवाड (27) आणि सुनील चंद्रकांत शिंदे (28) या दोघांना पोलिसांनी ताब्यात घेतले असून त्यांच्याविरुद्ध सिंहगड रस्ता पोलीस ठाण्यात गुन्हा दाखल करण्यात आला आहे.