पाली-खोपोली राज्य महामार्गावर भीषण अपघात; तिघेजण ठार

। पाली । प्रतिनिधी ।

पाली-खोपोली राज्य महामार्गावर मृत्यूचा सापळा बनत आहे. या राज्य महामार्गावर अपघाताची मालिका सुरूच आहे. बुधवारी (दि.18) दुपारी पाली-खोपोली राज्य महामार्गावर कानसळ गावाजवळील नेव्ही कॉलेज समोर बाईकस्वार स्कूल बसला धडकून अपघात झाला. या अपघातात बाईकरील तिघेजण ठार झाले आहेत. या अपघाताचा व्हिडिओ देखील समोर आला आहे.

श्रीराज एज्युकेशन सेंटरची स्कूल बस घोटावडे येथून शाळकरी मुलांना पालीकडे घेऊन जात होती. यावेळी पाली बाजूकडून खोपोलीच्या दिशेने वेगाने आलेला बाईकस्वार स्कूल बसला जाऊन धडकला. या बाईकवर तिघेजण प्रवास करत होते. यावेळी स्कूल बसच्या पाठीमागून येणाऱ्या कारच्या डॅश कॅमेऱ्यात ही सर्व थरारक घटना कैद झाली आहे. अपघाताची माहिती मिळताच पाली पोलीस निरीक्षक सरिता चव्हाण, सहा.पोलीस निरीक्षक युवराज सूर्यवंशी, पोलीस उपनिरीक्षक सचिन निकम, आदींसह पोलीस उपस्थित होते.

यावेळी पोलिसांसह अपघातग्रस्त मदत टीम, अमित खीस्मतराव आदींचे सहकार्य मिळाले. याच राज्य महामार्गावर दापोडे गावाजवळ मंगळवारी (दि.17) एनसीसीचे विद्यार्थी घेऊन जाणारी परिवहन महामंडळाची बस व कारचा भीषण अपघात झाला. यावेळी बस बाजूच्या शेतात कलंडली मात्र यामध्ये 45 विद्यार्थी थोडक्यात बचावले.