ध्वजदिनी निधी संकलन हे मोठे देशकार्य: किशन जावळे

| अलिबाग | प्रतिनिधी |

देशाच्या सीमेचे रक्षण करण्यासाठी सैनिक कायम कार्यरत असतात. या सैनिकांच्या मदतीसाठी ध्वज दिन निधी संकलन करणे हे एक मोठे देशकार्य आहे, असे प्रतिपादन जिल्हाधिकारी किशन जावळेंनी केले आहे. हे देशकार्य जास्तीत जास्त जनतेपर्यंत पोहोचून सैनिकांसाठी भरघोस निधी जमा करावा, असे आवाहन जिल्हाधिकारी जावळे यांनी केले.

जिल्हाधिकारी कार्यालयातील राजस्व सभागृह येथे बुधवारी जिल्हाधिकारी जावळे यांच्या अध्यक्षतेखाली ध्वजदिन निधी संकलन शुभारंभ-2025 करण्यात आला. कार्यक्रमाची सुरुवात दीप प्रज्वलनाने झाली आणि ध्वजदिन निधीत सहभाग देणाऱ्यांकडून निधी संकलित करण्यात आला. यावेळी शासकीय कर्मचारी निवृत्त जवान उपस्थित होते.

यावेळी अपर जिल्हाधिकारी सुनील थोरवे, अपर पोलीस अधीक्षक अभिजित शिवथरे, निवासी उपजिल्हाधिकारी संदेश शिर्के, जिल्हा अधीक्षक भूमीअभिलेख रायगड सुनील इंदलकर, जिल्हा सैनिक कल्याण अधिकारी कर्नल राहुल माने (निवृत) आदी उपस्थित होते. यावेळी जिल्हाधिकारी किशन जावळे म्हणाले की, 1949 पासून 7 डिसेंबर हा दिवस देशभरात सशस्त्र सेना ध्वज दिन म्हणून साजरा केला जातो. शहीद आणि गणवेशधारी सैनिकांना आदरांजली वाहण्यासाठी, ज्यांनी देशाच्या सन्मानाचे रक्षण करण्यासाठी आपल्या सीमेवर शौर्याने लढा दिला आणि लढत राहिले, त्यांचा सन्मान करण्यासाठी हा दिवस साजरा केला जातो. सैनिक हे कोणत्याही देशाच्या सर्वात मोठ्या संपत्तीपैकी एक असतात. ते राष्ट्राचे रक्षक असतात आणि कोणत्याही परिस्थितीत नागरिकांचे रक्षण करतात. आपले कर्तव्य पार पाडण्यासाठी, सैनिकांनी त्यांच्या आयुष्यात खूप काही बलिदान दिले आहे. मातृभूमीच्या सेवेत आपले प्राण अर्पण करणाऱ्या या शूरवीरांचा देश कायम ऋणी आहे.

केंद्र आणि राज्य पातळीवरील सरकारी उपाययोजनांव्यतिरिक्त, काळजी, आधार, पुनर्वसन आणि आर्थिक मदत देण्यासाठी आपले निःस्वार्थ आणि स्वेच्छेने योगदान देणे, हे आपल्या देशातील प्रत्येक नागरिकाचे सामूहिक कर्तव्य आहे. ध्वज दिन आपल्या युद्धात अपंग असलेल्या सैनिकांची, वीर नारींची आणि देशासाठी बलिदान देणाऱ्या शहिदांच्या कुटुंबांची काळजी घेण्याची आपली वचनबद्धता आपण पूर्ण करायला हवी. भारतमातेच्या संरक्षणासाठी ज्यांनी आपल्या प्राणांची आहूती देऊन सर्वोच्च बलिदान दिले अशा जवानांच्या कुटुंबियांच्या जीवनातील अडीअडचणी दूर करुन त्यांचे दैनंदिन जीवन सुसह्य व्हावे यासाठी तसेच युध्दात अपंगत्व प्राप्त झालेल्या आणि सशस्त्र दलातून निवृत्त झालेल्या जवानांच्या पुनर्वसनासाठी विविध कल्याणकारी योजना राबविण्यासाठी या निधीचा वापर केला जातो.