गणरायाचे आगमन खड्डेमय रस्त्यातून

| माथेरान | प्रतिनिधी |

गणेशोत्सव काही दिवसांवर येऊन ठेपलेला असूनही माथेरानमधील काही मुख्य रस्ते खड्डेमय झाले आहेत. काही ठिकाणी नव्याने क्ले पेव्हर ब्लॉक बसविण्यात आले आहेत. परंतु, त्याचे देखील निकृष्ट दर्जाचे काम झाले असून, काही ठिकाणी खड्डे पडले आहेत. प्रशासनाने त्यांची साधी डागडुजी सुद्धा केलेली नसल्याने याच खड्डेमय रस्त्यातून गणपती बाप्पाला धक्के झेलत प्रवास करावा लागणार आहे. त्यामुळे माथेरानमधील गणेशभक्तांमध्ये तीव्र नाराजीचे सूर उमटताना दिसत आहेत.

माथेरान येथील दस्तुरी नाक्यापासून ते लायब्ररी पर्यंत सद्यस्थितीत क्ले पेव्हर ब्लॉकचे रस्ते बनविण्यात आले आहेत. परंतु, त्या रस्त्यांची कामे अत्यंत घाईगडबडीत पूर्ण केल्यामुळे बहुतांश भागात निकृष्ट दर्जाचे काम झाले आहे. परिणामी पावसाळ्यात बहुतांश ठिकाणी खड्डे पडले आहेत. याच मार्गावरून सकाळी सहा वाजल्यापासून ते रात्री दहा वाजेपर्यंत ई-रिक्षांसह, घोडे, हातरिक्षा व पर्यटकांची मोठ्या प्रमाणात रहदारी सुरू असते. इंदिरा गांधी नगर या भागातील पशुवैद्यकीय दवाखान्यासमोर तर जागोजागी खड्डे पडले आहेत. त्यातून मार्ग काढताना खूपच त्रासदायक बनलेले असून प्रवाशांना धक्के खात प्रवास करावा लागत आहे. विशेष म्हणजे माथेरानमधील अधिकारी वर्ग याच मार्गावरून प्रवास करत असतात, तरीदेखील या खड्ड्यांकडे त्यांचे जाणिवपूर्वक दुर्लक्ष होत असल्याचे माथेरानकरांकडून आरोप केले जात आहेत. तसेच, थंड हवेचे ठिकाण म्हणून नावारूपाला आलेल्या माथेरानमध्ये उत्तम दर्जाचे रस्ते नाहीत, ही विदारक दृश्ये माथेरानच्या प्रतिमेला धोका निर्माण करणार असल्याचे देखील जागरूक नागरिकांमधून बोलले जात आहे.

दरम्यान, माथेरान नगरपरिषदेच्यावतीने सेंट्रल हॉटेल ते टपालपेटी नाका या मुख्य मार्गावरील खड्डे बुजविण्यात आले होते. परंतु, टपालपेटी नाका ते पशुवैद्यकीय दवाखाना या मार्गावर असलेल्या खड्ड्यांमुळे हातरिक्षा चालक, अश्वचालक, ई-रिक्षा चालक तसेच पर्यटक व स्थानिक नागरिकांना कठीण परिस्थितीला तोंड द्यावे लागत आहे. त्यातच चार दिवसांवर आलेल्या गणेशोत्सवाच्या कालावधीत ई-रिक्षातून श्रीगणेश मूर्ती आणण्यास गणेशभक्तांना खूप त्रास सहन करावा लागणार आहे. ई-रिक्षातून गणेश मूर्ती आणताना खड्ड्यांच्या खटक्यामुळे मूर्तिचे नुकसान होण्याची शक्यता नाकारता येत नाही. त्यामुळे त्याचा नगरपरिषदेच्या संबंधित विभागाने विचार करून लवकरात लवकर या मार्गावरील खड्डे बुजविण्याचे आदेश द्यावेत, जेणेकरून गणेशभक्तांसह पर्यटक व स्थानिक नागरिकांना या मार्गावरून प्रवास करताना व गणेशमूर्ती आणताना अत्यंत सोयीचे होईल, अशी मागणी माथेरानचे माजी उपनगराध्यक्ष चंद्रकांत जाधव यांनी केली आहे.