मुंबई-पुणे महामार्गावर गॅस टँकर पलटी

मुंबई लेनवरील वाहतूक ठप्प

। खोपोली । प्रतिनिधी ।

मुंबई-पुणे महामार्गावर आडोशी बोगद्याजवळ अत्यंत ज्वलनशील प्रोपलेन गॅस वाहतूक करणारा टँकर पलटी झाला. ही घटना मंगळवारी (दि.3) सायंकाळी सव्वापाच वाजण्याच्या सुमारास घडली. या अपघातानंतर टँकरमधून गॅस गळती सुरू झाल्याने सुरक्षिततेच्या कारणास्तव मुंबईकडे जाणारी वाहतूक पूर्णतः थांबविण्यात आली. त्यामुळे महामार्गावर वाहनांच्या लांबच लांब रांगा लागल्या आहेत.

मुंबई-पुणे महामार्गावरून टँकर पुण्याहून मुंबईच्या दिशेने जात असताना आडोशी बोगद्याजवळील एका तीव्र वळणावर चालकाचे वाहनावरील नियंत्रण सुटल्याने बोगद्याच्या प्रवेशद्वाराजवळच टँकर पलटी होत मोठा अपघात झाला. गॅस गळतीमुळे परिसरात भीतीचे वातावरण निर्माण झाले आहे. तर टँकरमध्ये प्रोपलेन हा अत्यंत ज्वलनशील व स्फोटक गॅस असल्याची माहिती मिळाल्यानंतर प्रशासनाने तातडीने खबरदारीचे उपाययोजना सुरू केल्या. धोका लक्षात घेऊन मुंबईकडे जाणारी वाहतूक तात्काळ रोखण्यात आली असून पुण्याकडील वाहतूकही नियंत्रित करण्यात आली आहे.

अपघाताची माहिती मिळताच बोरघाट पोलीस, आयआरबी महामार्ग पोलीस, देवदूत यंत्रणा तसेच हेल्प फाऊंडेशनची आपत्कालीन पथके तातडीने घटनास्थळी दाखल झाली. खोपोली येथील अग्निशमन दलाचे जवानही घटनास्थळी पोहोचले. गॅस गळतीवर नियंत्रण मिळविण्यासाठी युद्धपातळीवर प्रयत्न सुरू असून गॅस गळती रोखण्यासाठी विशेष पथकाला पाचारण करण्यात आले. तर अपघातामुळे मुंबई-पुणे महामार्गावर मोठ्या प्रमाणावर वाहतूक कोंडी निर्माण झाल्याने प्रवासी व वाहन चालकांना पर्यायी मार्गांचा वापर करण्याचे आवाहन पोलिसांकडून करण्यात आले.