वारकरी शिक्षण संस्थेत तरुणीवर लैंगिक अत्याचार

महिला किर्तनकारसह पाच जणांवर गुन्हा दाखल

। पुणे । प्रतिनिधी ।

आळंदी येथील केळगाव रस्त्यावर असलेल्या एका खासगी वारकरी शिक्षण संस्थेत तरुणीला डांबून तिच्यावर वारंवार लैंगिक अत्याचार करण्यात आल्याचा धक्कादायक प्रकार उघडकीस आला आहे. या प्रकरणात एक महिला किर्तनकारसह पाच जणांवर बलात्कार, अपहरण आणि धमकी प्रकरणी गुन्हा दाखल केला आहे.

पीडित तरुणी 2 जून 2025 रोजी घरी एकटी असताना तिच्या ओळखीच्या एका महिलेने तिला शेताकडे जाण्याचे कारण सांगून घराबाहेर नेले. त्याचवेळी वाटेत इर्टिगा गाडीतून आलेल्या आण्णासाहेब आंधळे, प्रविण आंधळे आणि एका अनोळखी चालकाने तिचे जबरदस्तीने अपहरण केले. तिने आरडाओरड केली असता अ‍ॅसिड टाकण्याची धमकी देण्यात आली. नंतर तिला आळंदी येथील खासगी मुलींच्या वारकरी शिक्षण संस्थेत नेले. तिथे आण्णासाहेब आंधळे, प्रविण आंधळे, कीर्तनकार सुनिता आंधळे आणि अभिमन्यु आंधळे यांनी तिला खोलीत डांबून ठेवले. फिर्यादीनुसार, या ठिकाणी आण्णासाहेब आंधळे यांनी तिच्यावर वारंवार शरीरसंबंधासाठी बळजबरी करत अत्याचार केले.

या प्रकरणात पोलिसांनी आण्णासाहेब प्रल्हाद आंधळे, प्रविण प्रल्हाद आंधळे, अनोळखी वाहनचालक, सुनिता अभिमन्यु आंधळे आणि अभिमन्यु भगवान आंधळे यांच्याविरुद्ध गुन्हा दाखल केला आहे. वारकरी सांप्रदाय, धार्मिक वातावरण असणाऱ्या आळंदीत अशा घटनांमुळे संताप व्यक्त केला जात आहे.