सरकारी आदेशाची गुरुजींना प्रतीक्षा

जिल्ह्यातील 2621 शाळांमध्ये 6483 शिक्षक कार्यरत
। अलिबाग । सिद्धी पाटील ।
जिल्हा परिषद शाळांमधील शिक्षकांच्या बदल्यांसाठी सरकार आता ऑनलाईन अर्जाचे धोरण राबवणार आहे. शिक्षकांच्या बदल्यांसाठी बनविण्यात आलेले मोबाईल ऑनलाईन अ‍ॅप्लिकेशनचे काम नुकतेच पूर्ण झाले आहे. या अ‍ॅपच्या माध्यमातून शिक्षकांच्या बदल्या ऑनलाईन पद्धतीने केल्या जाणार आहेत. नवीन बदली धोरणानुसार होणार्‍या या पहिल्याच बदल्या असणार आहेत. बदलीचे अ‍ॅप पूर्ण झाले असून त्याबाबत कोणतेही आदेश न दिल्यामुळे शिक्षकांसह प्रशासनाला बदली प्रक्रियेची प्रतिक्षा करावी लागणार आहे. राज्य सरकारचे बदली आदेश येईपर्यंत बदल्यांची प्रक्रिया सुरु होणार नसल्याचे रायगड जिल्हा परिषद अधिकार्‍यांडून सांगण्यात आले.

दरवर्षी शाळा सुरु होण्यापूर्वी शिक्षकांच्या बदल्यांची प्रक्रिया पूर्ण होते. पूर्वी ही प्रक्रिया ऑफलाइन होत असल्याने त्यात पारदर्शकता नसल्याचा अनेकदा आरोप झाला. त्यानंतर ग्रामविकास मंत्री हसन मुश्रिफ यांनी शिक्षकांची बदली प्रक्रिया ऑनलाइन करण्याचा निर्णय घेतला. कोरोनामुळे शाळा बंद होत्या. त्यामुळे त्यासंदर्भातील कार्यवाही झाली नाही. मात्र आता हे अ‍ॅप पूर्ण झाले असून मोबाईल आणि संगणक अशा दोन्ही ठिकाणी ते वापरता येणार आहे. त्यामुळे शिक्षकांना घरबसल्या ऑनलाइन बदलीचे अर्ज भरुन प्रशासनाकडे सादर करता येणार आहे.

शिक्षक बदल्यांचे टप्पे
सरकारी आदेश आल्यानंतर शिक्षकांना 8-10 दिवसांत भरावी लागणार वैयक्तिक माहिती

दरवर्षी अंदाजित अडीच लाख शिक्षक करतात आंतरजिल्हा बदलीसाठी अर्ज

जात प्रवर्गानुसार रिक्त जागांबाबत मुख्य कार्यकारी अधिकार्‍यांचे घ्यावे लागते ना हरकत प्रमाणपत्र

एकाच जिल्ह्यात तीन ते पाच वर्षांपर्यंत काम केलेले शिक्षकच बदल्यांसाठी पात्र

जिल्ह्यातील 2621 शाळांचा अहवाल
तालुका एकूण शाळा एकूण शिक्षक
अलिबाग 179 442
कर्जत 273 736
खालापूर 168 383
महाड 304 667
माणगाव 285 637
म्हसळा 101 230
मुरुड 86 205
पनवेल 248 916
पेन 220 519
पोलादपूर 125 270
रोहा 232 520
श्रीवर्धन 99 208
सुधागड 154 325
तळा 90 200
उरण 57 225