पावणेचार कोटींचा गुटखा जप्त; चार आरोपींना अटक

नवी मुंबई अंमली पदार्थ विरोधी कक्षाची कारवाई

| पनवेल | प्रतिनिधी |

नवी मुंबई पोलिसांच्या अंमली पदार्थ विरोधी पथकाने भिवंडी आणि मध्य प्रदेशातून आणलेला तब्बल 3 कोटी 77 लाख 28 हजार रुपयांचा प्रतिबंधित गुटख्याचा साठा जप्त करत मोठी कारवाई केली आहे. या कारवाईत पाच कंटेनर आणि चार आरोपींना अटक करण्यात आली आहे. हा गुटख्याचा साठा महाराष्ट्रात विक्रीसाठी आणला गेल्याचे प्राथमिक तपासात आढळून आले आहे. दरम्यान, आरोपींनी हा गुटख्याचा साठा कोठून आणला आणि कोठे विक्रीसाठी नेला जाणार होता? याचा पोलिसांकडून तपास करण्यात येत आहे.

अंमली पदार्थ विरोधी पथकाने मुंबई-पुणे महामार्गावर कामोठे येथे सापळा लावून भिवंडी येथून कामोठे येथे विक्रीसाठी आणण्यात आलेला टेम्पो पकडला होता. या कारवाईत पोलिसांनी फरहान माजिद शेख (23) या तरुणाला अटक करुन टेम्पोसह तब्बल 22 लाख 40 हजार रुपये किमतीचा गुटख्याचा साठा जप्त केला होता. त्यानंतर अंमली पदार्थ विरोधी पथकाने आरोपी फरहान याची अधिक चौकशी केली असता, त्याने सदर गुटख्याचा साठा भिवंडीतील येवई गावातून आणल्याची कबुली दिली. फरहान शेखकडून मिळालेल्या माहितीच्या आधारे अंमली पदार्थ विरोधी पथकाचे वरिष्ठ पोलीस निरीक्षक संदीप निगडे, सहाय्यक पोलीस निरीक्षक निलेश धुमाळ, सूरज गोरे यांनी तीन पोलीस अधिकारी आणि 20 पोलीस अंमलदार यांच्या मदतीने नाशिक-ठाणे महामार्गावरील येवई गावात छापा टाकला. यावेळी याठिकाणी प्रतिबंधित गुटख्याने भरलेले चार कंटेनर आढळून आले. या कारवाईत पोलिसांनी तीन चालकांसह गुटख्याने भरलेले चारही कंटेनर बेलापूर येथील अंमली पदार्थ विरोधी कक्षात आणले. त्यानंतर अन्न-औषध प्रशासनाच्या अधिकऱ्यांच्या मदतीने त्याची तपासणी केली असता चारही कंटेनरमध्ये तब्बल 3 कोटी 54 लाख 88 हजार रुपयांचा प्रतिबंधित गुटखा असल्याचे आढळून आले. त्यानंतर अंमली पदार्थ विरोधी पथकाने जितेंद्र मांगीलाल वसुनिया, भूपेंद्र राजेंद्र सिंग आणि भंवर खेमराज सिंग या तीन चालकांना अटक केली. या संपूर्ण कारवाईत पाच कंटेनरसह तब्बल 3 कोटी 77 लाख रुपयांचा गुटख्याचा साठा जप्त करुन एकूण चार आरोपींना अटक करण्यात आल्याची माहिती गुन्हे शाखेचे सहाय्यक पोलीस आयुक्त अशोक राजपूत यांनी दिली. कामोठे येथील कारवाईत पकडण्यात आलेला आरोपी फरहान शेख याला न्यायालयाने पोलीस कोठडी ठोठावली असल्याचे राजपूत यांनी सांगितले.