रायगड जिल्हयाला यलो अलर्ट जाहीर
| पुणे | प्रतिनिधी |
राज्यात उन्हाचे चटके असह्य झाले असताना आता हवामान खात्याने राज्यात पुढील तीन दिवस पावसाचा अंदाज वर्तवला आहे. पावसाची शक्यता असल्याने काही जिल्ह्यांना ऑरेंज, तर रायगड जिल्हयासह काही ठिकाणी यलो अलर्ट जारी करण्यात आला आहे. राज्यात काही ठिकाणी गडगडाटासह मुसळधार पावसाचा अंदाजही हवामान खात्याने वर्तवला आहे. या अवकाळी पावसाचा पिकांना मोठ्या प्रमाणात फटका बसणार आहे. आंबा पिकाला मोठा फटका बसण्याची शक्यता असून, आंब्यांचे उत्पादन घटण्याची शक्यता आहेत. यामुळे शेतकरी, बागायतदार हतबल झाले आहेत.
मध्य महाराष्ट्र आणि घाटमाथ्याला 1 आणि 2 एप्रिल रोजी ऑरेंज अलर्ट देण्यात आला आहे. तर आठ शहरांना बुधवारी ऑरेंज अलर्टचा इशारा दिला आहे. पुढील दोन दिवस पुणे शहर, पिंपरी-चिंचवडसह ग्रामीण भागात विजांच्या कडकडाटासह मध्यम ते मुसळधार पाऊस पडेल, असा अंदाज हवामान विभागाने दिला आहे. या पावसाने उष्णतेपासून थोडा दिलासा मिळणार आहे. सरासरी तापमानात 5 अंशांची घट होण्याची शक्यता आहे. मात्र, त्यानंतर उकाड्यात पुन्हा वाढ होणार आहे. एप्रिल ते जूनदरम्यान तापमान सरासरीपेक्षा जास्त राहील, असाही अंदाज वर्तवला आहे.
पुणे, सातारा, जळगाव, नाशिक, अहिल्यानगर, छत्रपती संभाजीनगर, जालना, गोंदिया या ठिकाणी हवामान खात्याने ऑरेंज अलर्ट जारी केला आहे. तर मुंबई आणि उपनगरे, ठाणे, रायगड, रत्नागिरी, सिंधुदुर्ग, धुळे, नंदुरबार, जळगाव, नाशिक, अहिल्यानगर, कोल्हापूर, सातारा, सांगली, छत्रपती संभाजीनगर, जालना, परभणी, बीड, नांदेड, लातूर, धाराशिव, अकोला, अमरावती, भंडारा, चंद्रपूर, गडचिरोली, गोंदिया, नागपूर, वर्धा, वाशीम, यवतमाळ येथे यलो अलर्ट देण्यात आला आहे.