| नवी मुंबई | प्रतिनिधी |
नवी मुंबई मनपा हद्दीत बेकायदा बांधकामे सुरु असून तेथील घरांच्या किंमती तीन ते सहा कोटींच्या घरात असल्याचे निदर्शनास आले आहे. नेरुळ एनआरआय कॉम्प्लेक्सच्या पाठीमागील बाजूस नेरुळ सेक्टर 60 येथील डी व ई येथे मे. मिस्त्री कन्स्ट्रक्शन यांना पालिकेची कोणतीही बांधकाम परवानगी देण्यात आली नाही. त्यामुळे विनापरवाना सुरु असलेल्या कामाबाबत खुलासा सादर करावा अन्यथा महाराष्ट्र प्रादेशिक व नगररचना अधिनियम 1966 चे प्रकरण 52 व 53 अन्वये कारवाई करण्याचा इशारा लेखी पत्राद्वारे पालिकेने दिला आहे.
ा बेकायदा बांधकाम असलेल्या या घरांच्या किंमती मात्र 3 करोडपासून 6.60 करोडपर्यंत आहेत. त्यामुळे पालिकेने नुसते खुलासा मागवून बघ्याची भूमिका घेतली आहे. भविष्यात याच ठिकाणी फसवणूक झाल्यास बघ्याची भूमिका घेणार्या पालिकेला जबाबदार धरण्याचा इशारा पर्यावरणप्रेमी व स्थानिक नागरिकांनी केला आहे. नेरुळ एनआरआय पाठीमागील सुरु असलेल्या मिस्त्री कन्स्ट्रक्शनचे काम पालिकेच्या बांधकाम परवानगीविना सुरु असून काम तात्काळ थांबवण्याची मागणीही पर्यावरणप्रेमी व स्थानिक नागरीकांनी मुख्यमंत्री एकनाथ शिंदे यांच्याकडेही केली आहे.
सीवूड्स एनआरआय कॉम्प्लेक्स येथील कामावरुन पर्यावरणप्रेमींनी वारंवार पालिका, सिडको, पर्यावरण विभाग, महाराष्ट्र शासन यांच्याकडे पाठपुरावा करत आहेत .एनआरआय कॉम्प्लेक्सच्या पाठीमागील बाजूस पाणथळ जमिनीवर बहुमजली 9 निवासी संकुले व गोल्फ मैदान बनविण्याबाबतचे प्रकरण न्यायप्रविष्ट असताना दुसरीकडे न्यायालयाच्या सूचनांना व पर्यावरण मंत्र्यांच्या आदेशाला केराची टोपली दाखवत या ठिकाणी बेकायदा बांधकाम सुरु आहे.सीवूड्स एनआरआय परिसरात सिडकोच्या परवानगीने मिस्त्री कंन्सट्रक्शन यांनी 724 झाडे तोडल्याप्रकरणी तसेच येथील गोल्फ कोर्स व गृहसंकुल निर्मिती प्रकरणाबाबत सुरवातीपासूनच पाठपुरावा करणारे या विभागातील पर्यावरणप्रेमी व नागरीक यांनी संताप व्यक्त केला आहे. सीवूडस सेक्टर 60 एनआरआय कॉम्प्लेक्सच्या पाठीमागील बाजूस असलेल्या ऐ,बी,सी डी व ई ब्लॉकमधील 33.55 हेक्टर जागेवर गोल्फ कोर्स व बहुमजली निवासी उभारण्याची परवानगी सिडकोने दिली आहे.परंतू सर्वोच्च न्यायालयानेही ऑक्टोबर 2017मध्ये ही जागा पाणथळ यादीत असल्याने येथील काम तात्काळ थांबवण्याचे आदेश दिले होते.
नवी मुंबई महापालिका क्षेत्रातील या जागेवर बांधकाम परवानगी सिडकोने दिल्याबद्दल आश्चर्य व्यक्त करण्यात येत आहे. पालिकेच्या अधिकारावर हा गदा आणण्याचा प्रकार असून पालिकेनेही याबाबत संबंधित मे. मिस्त्री कन्स्ट्रक्शनला खुलासा करण्याचे पत्र दिले आहे. त्यामुळे याबाबत मुख्यमंत्री यांनी तातकाळ लक्ष घालून नेरुळ एनआरआय जवळील बेकायदा काम तात्काळ थांबवण्याची मागणी पर्यावरणप्रेमी व स्थानिक नागरिकांनी मुख्यमंत्र्यांकडे केली आहे. दुसरीकडे नवी मुंबई महापालिकेच्या नगररचना विभागानेही संबंधित कंपनीला तात्काळ खुलासा करण्याचे पत्र दिले आहे.परंतू अद्याप यावर कोणतीही कारवाई झालेली नसल्याबद्दल स्थानिक नागरीकांमध्ये रोष निर्माण झाला आहे. आता याबाबत मुख्यमंत्री काय निर्णय घेणार याकडे सर्वांचे लक्ष लागले आहे.
बेकायदा बांधकाम पण किंमत करोडोंची
1040 स्क्वेअर फुट- किंमत 3 ते 3.60 करोड
1080 स्क्वेअर फुट- किंमत 3 ते 3.75 करोड
1300 स्क्वेअर फुट – किंमत 5 ते 5.31 करोड
1560 स्क्वेअर फुट – किंमत 6 ते.60 करोड
पालिकेच्या जागेतील जागेवर बांधकाम परवानगी
नेरुळ एनआरआय जवळील जागा पाणथळ म्हणून असताना दुसरीकडे बेकायदा काम सुरु आहे. सिडकोला अधिकार नसताना पालिकेच्या जागेतील जागेवर बांधकाम परवानगी दिली. या ठिकाणची घरे करोडो किंमतीमध्ये असून पालिकेने नुसता खुलासा करण्याचे पत्र दिले आहे. पालिकेची बांधकाम परवानगी नसलेले बेकायदा काम पालिकेने तात्काळ थांबवले पाहीजे. अन्यथा अनेकांचे करोडोंचे नुकसान होईल.त्याला पालिका जबाबदार राहील, असे मत पर्यावरणप्रेमी कांचन पुरोहीत यांनी दिली.