नवी मुंबईत अंदाज न आल्याने दुचाकी थेट जेट्टीत

। नवी मुंबई । प्रतिनिधी ।

नवी मुंबईतील बेलापूर येथील खाडीत अंदाज न आल्याने एक दुचाकी स्वार थेट खाडीच्या पाण्यात दुचाकीसह गेला. ही घटना शनिवारी (दि. 27) सकाळी साडे सहाच्या सुमारास घडली आहे. यात अग्निशमन दलाने दुचाकीवर मागे बसलेल्या व्यक्तीला वाचवण्यात यश मिळवले आहे. मात्र, दुचाकी चालवणाऱ्याचा शोध घेण्यात येत आहे. दुचाकी पाण्याबाहेर काढण्यात यश आले आहे.

नवी मुंबईतील बेलापूर येथे असणाऱ्या खाडीत अंदाज न आल्याने दुचाकी पाण्यात गेली. ही माहिती मिळताच सीबीडी पोलीस आणि सीबीडी अग्निशमन दलाने घटनास्थळी धाव घेतली. यात दुचाकी चालकाचा शोध घेण्यात येत आहे, तर दुचाकी वर मागे बसलेल्या तरुणाला वाचवण्यात यश आले आहे. रेस्क्यू टीम ने दुचाकी बाहेर काढली आहे. याबाबत अग्निशमन दलास माहिती मिळताच ते तात्काळ घटनास्थळी रवाना झाले होते. नवी मुंबई सागरी पोलीस या अपघाताचे गांभीर्य लक्षात घेऊन युद्धपातळीवर शोधमोहीम राबवत आहेत. या शोधकार्यासाठी स्थानिक गोताखोर, अनुभवी मासेमार आणि विशेष रेस्क्यू टीम यांची मदत घेतली जात आहे. मात्र, खाडीतील पाण्याचा प्रवाह आणि गाळामुळे शोधकार्यात अडथळे येत आहेत. या घटनेमुळे ध्रुवतारा जेट्टी परिसरात एकच हळहळ व्यक्त होत आहे.

बेलापूर जेट्टीचा हा परिसर ध्रुवतारा म्हणून ओळखला जातो. बेलापूर जेट्टीत दोनच महिन्यापूर्वी असाच अपघात झाला होता. गुगल मॅप चे मार्गदर्शन घेत ऑडी चालवणारी एका महिलेस उड्डाणपूल आणि त्याच्या शेजारी जेट्टी कडे जाणारा मार्ग यात गफलत झाल्याने तिने ऑडी थेट खाडीत घातली. यात सुदैवाने तिला वाचवण्यात यश आले होते. या ठिकाणी एका बाजूला उरण कडे जाणारा खाडी उड्डाणपूल आहे, तर उड्डाणपुलाच्या शेजारी असणारा रस्ता हा थेट खाडीत जातो. या ठिकाणी असे अपघात होऊ नये यासाठी संरक्षक आली अथवा भिंत बांधण्यात यावी. किमान रात्रीच्या वेळी लाईट्स दिशादर्शक रेडियम लावण्यात यावे अशी मागणी अनेक महिन्यापासून केली जात आहे. मात्र, त्याकडे संबंधित प्रशासन गांभीर्याने पाहत नसल्याचा आरोप नेहमी होत असतो. आजची घटना गंभीर असून, आता तरी त्याची दखल घेत योग्य ती कारवाईची अपेक्षा व्यक्त होत आहे.