अधिकारी वर्गाचा खिसा गरम
| उरण | वार्ताहर |
उरण नगरपालिका हद्दीतील बिल्डर लॉबीच्या तालावर बांधकाम विभागातील अधिकारी वर्ग डोलत असल्याने सर्वसामान्य जनतेच्या कामांचा खोळंबा होताना दिसत आहे. बिल्डर लॉबीपासून अधिकारी वर्गाचा खिसा गरम होत असल्याने त्यांची कामे झटकेपट होताना दिसत आहेत. याबाबत तक्रारी करूनही अधिकारी वर्ग उडवाउडवीची उत्तरे देऊन आपली जबाबदारी झटकताना दिसत आहेत. तरी उरण नगरपालिका बांधकाम विभागातील अधिकारी वर्गाच्या मालमत्तेची चौकशी केली तर नक्कीच ते मालामाल असल्याचे उघड होईल.
राज्यात सध्या तिघाडी शासन सुरू असल्याने प्रशासनावर कोणाचाही वचक नसल्याने प्रशासकीय अधिकारी व कर्मचाऱ्यांची मुजोरी वाढली आहे. स्थानिक स्वराज्य संस्था, नगरपालिका, जिल्हा परिषद, पंचायत समिती निवडणुका रखडल्या आहेत. यामुळे या संस्थातून प्रशासनावर कोणीही अंकुश ठेवणारे नसल्याने या संस्थातून संपूर्ण अंदाधुंदी कारभार सुरू आहे.
येथील महसूल विभागात एवढा सावळा गोंधळ निर्माण झाला आहे की कोणताही कर्मचारी अथवा अधिकारी मन मानेल तेव्हा कार्यालयात येतो, आणि जातो. महत्वाचे म्हणजे संबंधित कर्मचारी अथवा अधिकारी मोबाईलवरून निर्णय देत आहेत किंवा आर्थिक देवाणघेवाण करण्यासाठी कार्यालयाबाहेर भेटणे पसंद करत असल्याचे अधिकृत सूत्रांकडून समजते. उरण नगरपालिका कार्यालयातील बांधकाम विभागातील अधिकारी वर्ग कार्यालयात गेल्यावर खुर्च्या रिकाम्या असल्याचे दिसतात. तर मोबाईलवरून संपर्क साधला असता फोन उचलण्याची तसदी ही घेतली जात नाही.
याउलट बिल्डर लॉबीची कामे ही फोनवरच होत आहेत. काही बिल्डरांनी खोटी कागदपत्रे जोडून परवानगी घेऊन इमारत उभी केल्या आहेत. तर काहींनी 1 अधिक 2 ची परवानगी घेऊन नियमांची पायमल्ली करून आणखीन मजले वाढविले आहेत. तर नगरपालिका जागेवरही अतिक्रमण करण्यात येत आहे. हे सर्व अर्थपूर्ण व्यवहारातून बिल्डर लॉबीचे बगलबच्चे व उरण नगरपालिका बांधकाम विभागातील अधिकारी वर्ग यांची नेहमीच गुप्त ठिकाणी भेटीगाठी होऊन कागदोपत्री सर्व ओके असल्याचा रिपोर्ट देऊन वरिष्ठ अधिकारी वर्गाची दिशाभूल करून अधिकारी वर्ग मालामाल झाले आहेत.