विद्यार्थ्यांची स्वच्छतागृहाअभावी गैरसोय

नगरपरिषद प्रशासनाचे दुर्लक्ष

| माथेरान | वार्ताहर |

शहराच्या मध्यवर्ती भागात असलेल्या नगरपरिषदेच्या वीर हुतात्मा भाई कोतवाल या शाळेतील नादुरुस्त स्वच्छतागृहाचे काम अद्यापही पूर्ण करण्यात आलेले नसल्याने याचा शालेय विद्यार्थ्यांना प्रचंड त्रास सहन करावा लागत आहे. सर्वसामान्य कष्टकरी लोकांची मुले या शाळेत शिकत असून, पावसाळ्यात लहान-लहान मुलांना स्वच्छतागृहाच्या दुरुस्तीच्या कामामुळे याचा वापर करता येत नसल्याने पावसातून सार्वजनिक शौचालयाकडे धाव घ्यावी लागत आहे.

डिसेंबर महिन्यापासून सुरू असलेले स्वच्छतागृह दुरूस्तीचे काम अजूनही अपूर्ण अवस्थेत आहे. नगरपरिषदेच्या अखत्यारीत सर्व कामगार यंत्रणा कार्यरत असतानादेखील शाळेसारख्या महत्त्वपूर्ण क्षेत्रामध्ये अपूर्ण कामांत दिरंगाई केली जात असल्याने पालकवर्गात तीव्र नाराजी व्यक्त होत आहे. त्यातच सभागृहात लोकप्रतिनिधी नसल्याने शाळेतील समस्यांकडे दुर्लक्ष होत आहे. संबंधित अधिकारी वर्गाने लवकरच शाळेतील विद्यार्थ्यांना भेडसावत असणार्‍या प्रश्‍नांची उकल लवकरात लवकर करावी, अशी पालकवर्गासह स्थानिकांमधून मागणी होत आहे.

स्वच्छतागृहाची कामे अद्यापही पूर्ण झाली नसल्याने लहान मुलांना शौचास जाण्यासाठी सार्वजनिक शौचालयाचा वापर करावा लागतो. स्वच्छतागृहांची ताबडतोब दुरुस्ती करण्यात यावी यासाठी संबंधित अधिकारीवर्गाची आम्ही पालक वर्ग दोन दिवसांत भेट घेणार आहोत.

ज्योती सुरेश शिंदे,
अध्यक्षा,
शाळा शिक्षण समिती,
नगरपरिषद शाळा माथेरान