एक्स्प्रेस वेवरील टोल दरात वाढ

| मुंबई | प्रतिनिधी |

मुंबई-पुणे एक्स्प्रेसवरील प्रवास आणखी महागणार आहे. कारण,या मार्गावरील टोलच्या दरांमध्ये लवकरच वाढ होणार आहे. 1 एप्रिल 2023 पासून द्रुतगती मार्गावरून प्रवास करणार्‍यांना टोलसाठी 18 टक्के अधिक रक्कम मोजावी लागणार आहे. 2004 साली सार्वजनिक बांधकाम विभागाकडून मुंबई-पुणे द्रुतगती मार्गाच्या टोलमध्ये दर तीन वर्षांनी 18 टक्के वाढ करण्याची अधिसूचना काढण्यात आली होती. त्यानुसार, 2023 मधील टोलच्या दरात वाढ करण्याचा निर्णय घेण्यात आला आहे. याआधी 1 एप्रिल 2020 मध्ये अशीच वाढ झाली होती. मात्र 1 एप्रिल 2023 ला लागू होणारे टोलचे दर हे 2030 पर्यंत कायम असतील, असे एमएसआरडीसी कडून सांगण्यात आलं. यंदा किमान सध्याच्या दरापेक्षा 50 ते 70 रुपयांनी वाढ करण्यात आली आहे.